ஐரோப்பிய ஒன்றியத்தின் முதன்மைச் சட்டமன்ற அமைப்பான ஐரோப்பிய பாராளுமன்றம், நாட்டின் தலைநகரான ஒட்டாவாவில் தனது புதிய ‘தொடர்பு அலுவலகம்’ (Antenna Office) ஒன்றைத் திறக்கவுள்ளதாக அறிவித்துள்ளது.
ஐரோப்பிய ஒன்றியத்துடன் (EU) கனடா இணைந்து, ஒரு “தனித்துவமான கூட்டணியை” (Unique Alliance) உருவாக்குவது தொடர்பிலான பேச்சுகளைத் தொடங்கத் திட்டமிட்டுள்ளதாகப் பிரதமர் மார்க் கார்னி அறிவித்துள்ள நிலையிலேயே, ஐரோப்பிய பாராளுமன்றம் இந்த அறிவிப்பை வெளியிட்டுள்ளது.
ஒட்டாவா மற்றும் பிரஸ்ஸல்ஸ் இடையே அதிகரித்து வரும் ராஜதந்திர மற்றும் நாடாளுமன்ற உறவுகளை இது மேலும் வலுப்படுத்தும் எனக் கருதப்படுகிறது.
இதேவேளை, பிரதமர் மார்க் கார்னி ஐரோப்பிய ஒன்றியத்தின் முழுமையான உறுப்பினராகவோ அல்லது இணை உறுப்பினராகவோ இணைவதற்கு கனடா முயலவில்லை என்பதையும் அவர் திட்டவட்டமாகத் தெளிவுபடுத்தியுள்ளார்.
27 நாடுகளைக் கொண்ட ஐரோப்பிய ஒன்றியப் பாராளுமன்றத்தில் எதிர்வரும் வியாழக்கிழமை உரையாற்றவுள்ள நிலையிலேயே, மார்க் கார்னி இந்த முக்கிய அறிவிப்பை தற்போது வெளியிட்டுள்ளார்.
பிரதமர் மார்க் கார்னியின் இந்த நடவடிக்கையை எதிர்க்கட்சியான கன்சர்வேடிவ் கட்சியின் தலைவர் பியர் பொய்லியேவ் (Pierre Poilievre) கடுமையாக விமர்சித்துள்ளார்.
“கனடா ஒருபோதும் அமெரிக்காவின் 51-வது மாநிலமாக மாறாது” எனத் தெரிவித்துள்ள, பியர் பொய்லியேவ் (Pierre Poilievre) “அதேபோல் ஐரோப்பிய ஒன்றியத்தின் 28-வது மாநிலமாகவும் மாறாது” எனவும் குறிப்பிட்டுள்ளார்.
