மொண்ட்ரீயல் நகரின் வரலாற்றுச் சிறப்புமிக்க அடையாளங்களில் ஒன்றான ‘கனடா மால்டிங்’ (Canada Malting) தொழிற்சாலைக் கட்டடம், இடிந்து விழும் அபாயம் உள்ளதாகப் பொறியியல் வல்லுநர்கள் எச்சரித்துள்ளதை அடுத்து, அதன் ஒரு பகுதி உடனடியாகப் பிரிக்கப்படவுள்ளது.
இப் பணிகள் எதிர்வரும் 19 ஆம் திகதி முதல் ஆரம்பமாகும் என அறிவிக்கப்பட்டுள்ளது.
மொண்ட்ரீயல் நகரின் சட்-வெஸ்ட் (Sud-Ouest) பகுதியில், லாச்சின் கால்வாயை (Lachine Canal) ஒட்டியுள்ள இந்த நூற்றாண்டு பழமையான தொழிற்சாலைக் கட்டடம் பல தசாப்தங்களாகப் பயன்பாடின்றி கைவிடப்பட்டுள்ளது.
கடந்த மாதத்தின் தொடக்கத்தில் வெளியிடப்பட்ட பொறியியல் அறிக்கை ஒன்றில், இக் கட்டடம் பொதுமக்களின் பாதுகாப்பிற்கு “உடனடி ஆபத்தை” (imminent danger) ஏற்படுத்துவதாகத் தெரிவிக்கப்பட்டுள்ளது.
குறிப்பாக, கட்டடத்தின் மேற்பகுதியிலிருந்து கழன்றுள்ள செங்கல் முகப்புச் சுவர் (brick facade wall) எந்த நேரத்திலும் செயின்ட்-அம்ப்ரோயிஸ் வீதியின் (St-Ambroise Street) மீது இடிந்து விழும் அபாயத்தில் உள்ளதாக பொறியாளர்கள் எச்சரித்துள்ளனர்.
இதனால் பாதசாரிகளுக்குப் பலத்த காயம் ஏற்படலாம் எனவும், அப்பகுதியில் நிறுத்தப்படும் வாகனங்கள் சேதமடையலாம் எனவும் அஞ்சப்படுகிறது.
கட்டடத்தைப் பராமரிக்கும் ‘Développement La Malterie S.E.C.’ நிறுவனத்தின் சார்பில் கருத்துத் தெரிவித்துள்ள சொத்து மேம்பாட்டாளர் நோஆம் ஷ்னிட்சர் (Noam Schnitzer), வரலாற்றுச் சிறப்புமிக்க இந்த அடையாளத்தின் முக்கியத்துவத்தை உணர்ந்து மிகுந்த கவனத்துடன் இந்தப் பணிகள் மேற்கொள்ளப்படும் என்று தெரிவித்தார்.
இப் பணிகள் சுமார் ஐந்து நாட்கள் நீடிக்கும் எனவும், அதனைத் தொடர்ந்து கனரக உபகரணங்களை அகற்றுவதற்கு மேலும் மூன்று நாட்கள் தேவைப்படும் எனவும் எதிர்பார்க்கப்படுகிறது.
