கியூபெக் மாகாணத்தில் விமானப் பயணம் ஒன்றின்போது Cockpit எனப்படும் விமானி அறைக்குள் பலவந்தமாக நுழைய முயன்ற நபர் ஒருவருக்கு நீதிமன்றம் மறுவாழ்வுப் பயிற்சியைப் பெறுமாறு உத்தரவிட்டுள்ளது.
கியூபெக்கின் லோவர் நார்த் ஷோர் (Lower North Shore) பகுதியில் உள்ள பாக்குவா ஷிபி (Pakua Shipi) பகுதியைச் சேர்ந்த 34 வயதான கெர்ரி மார்க் (Kerry Mark) என்பவரே இவ்வாறு நீதிமன்ற உத்தரவுக்கு உட்படுத்தப்பட்டுள்ளார்.
சென்-இலெட் (Sept-Îles) நகரில் உள்ள நீதிமன்றத்தில் காணொளி வாயிலாக ஆஜர்படுத்தப்பட்ட அவரை, நீதிபதி அலெக்சாண்டர் ஜெர்மன் கடுமையான நிபந்தனைகளுடன் பிணையில் விடுவித்தார்.
இதன்படி, பெகான்கூர் (Bécancour) பகுதியில் அமைந்துள்ள மறுவாழ்வு மையத்திற்கு கெர்ரி மார்க் அனுப்பப்பட்டு, அங்கு வெற்றிகரமாக மறுவாழ்வுப் பயிற்சியை முடிக்க வேண்டும் என நீதிபதி உத்தரவிட்டுள்ளார்.
மேலும், கெர்ரி மார்க் எவ்விதமான துப்பாக்கிகள் அல்லது கத்திகளை வைத்திருக்கக் கூடாது எனவும், போதைப்பொருள் அல்லது மது அருந்தக் கூடாது எனவும் தடை விதிக்கப்பட்டுள்ளது.
அத்துடன் அவர் வாகனம் ஓட்டவோ அல்லது விமானத்தில் பயணிக்கவோ முற்றிலுமாகத் தடை விதிக்கப்பட்டுள்ளது.
கடந்த 6 ஆம் திகதி பிளாங்க்-சப்லான் (Blanc-Sablon) பகுதியிலிருந்து சென்-இலெட் நோக்கிச் சென்ற ‘ஏர் லியேசன்’ (Air Liaison) விமானத்தின் பயணத்தின் போதே, கெர்ரி மார்க் இந்தக் குற்றச் செயலைப் புரிந்துள்ளார்.
லா ரொமைன் (La Romaine) நகரில் விமானம் தரையிறங்கி நின்றவேளையில் ஏறிய கெர்ரி மார்க், கடும் உளவியல் பாதிப்புக்குள்ளான நிலையில் விமானக் கூடம் திறக்க முயன்றதாக மாகாணப் பொலிஸார் தெரிவித்திருந்தமை குறிப்பிடத்தக்கது.
