கியூபெக் மாகாணத் தேர்தலில் ‘கோலிஷன் அவெனிர் கியூபெக்’ (CAQ) கட்சி ஒரு ஆசனத்தைக்கூடக் கைப்பற்ற முடியாமல் படுதோல்வியைச் சந்தித்துள்ளது.
கடந்த 2018 மற்றும் 2022 ஆம் ஆண்டுகளில் பெரும்பான்மை பலத்துடன் ஆட்சியைப் பிடித்த இக்கட்சி, அண்மையில் நடைபெற்ற தேர்தலில் 5 லட்சத்து 72 ஆயிரத்துக்கும் அதிகமான வாக்குகளைப் பெற்ற போதிலும், தேசிய சட்டமன்றத்தில் எந்தவொரு தொகுதியிலும் வெற்றி பெறவில்லை.
தேர்தல் முடிவுகளைத் தொடர்ந்து, கட்சியின் தலைவரான கிறிஸ்டின் பிரெசெட் (Christine Fréchette) தனது பதவியை இராஜினாமா செய்துள்ளார்.
இதையடுத்து, இம்மாதம் 17ஆம் திகதி கட்சியின் நிர்வாகக் குழுவினர் இடைக்காலத் தலைவர் ஒருவரைத் தேர்ந்தெடுக்கவுள்ளதாக நிர்வாக இயக்குநர் பிரிஜிட்டா லெகால்ட் (Brigitte Legault) தெரிவித்துள்ளார்.
புதிதாகத் தேர்ந்தெடுக்கப்படும் இடைக்காலத் தலைவர், கட்சியை மீண்டும் கட்டியெழுப்பும் நோக்கில் அடுத்த கட்டத் தலைமைப் போட்டியை நடத்துவதற்கான பொறுப்பை ஏற்பார்.
முன்னாள் சட்டமன்ற உறுப்பினர்கள் பலர் தலைமைப் பொறுப்பை ஏற்க ஆர்வம் காட்டி வரும் நிலையில், ரிச்மண்ட் தொகுதியில் போட்டியிட்ட வழக்கறிஞர் குய்லோம் ரூசோ (Guillaume Rousseau) போட்டியில் களமிறங்குவது குறித்து பரிசீலித்து வருகிறார்.
இதேவேளை, 59 இடங்களைக் கைப்பற்றியுள்ள Parti Québécois கட்சி, கியூபெக் மாகாணத்தில் சிறுபான்மை அரசை அமைக்கவுள்ளது.
CAQ கட்சி பிற கட்சிகளுடன் இணைக்கப்படுமா என்ற விவாதங்கள் எழுந்தபோதிலும், அதுமுதிர்ச்சியற்ற உரையாடல் எனப் பிரிஜிட்டா லெகால்ட் மறுத்துள்ளார்.
சட்டமன்றத்தில் பிரதிநிதிகள் இல்லாவிட்டாலும், தேர்தலில் பெற்ற வாக்குகளின் அடிப்படையில் கியூபெக் தேர்தல் சட்டத்தின்படி CAQ கட்சிக்கு ஆண்டுக்குச் சுமார் 1.7 மில்லியன் டொலர்கள் வரை நிதி ஒதுக்கீடு கிடைக்கும் என்று எதிர்பார்க்கப்படுகிறது.
