கியூபெக் மாகாணத்தில் உள்ள ஒடாவா (Outaouais) பகுதியில் ஏற்பட்டுள்ள கடுமையான மருத்துவர்கள் பற்றாக்குறையை உடனடியாக நிவர்த்தி செய்யுமாறு, புதிய அரசாங்கம் அமைக்கவுள்ள தரப்பிடம் கோரிக்கை முன்வைக்கப்பட்டுள்ளது.
அப்பகுதியைச் சேர்ந்த மருத்துவர்கள் சங்கம், கியூபெக்கில் புதிதாக பதவியேற்கவுள்ள Parti Québécois கட்சியினரிடம் இந்தப் பிரச்சினை தொடர்பில் கவனம் செலுத்துமாறு கோரியுள்ளனர்.
கடந்த ஆண்டு அக்டோபர் மாதம் கியூபெக்கின் முன்னைய அரசாங்கத்தினால் கொண்டுவரப்பட்ட ‘மசோதா 2’ (Bill 2) சட்டமாக்கப்பட்டு அமல்படுத்தப்பட்டது.
மருத்துவர்களின் ஊதியத்தை அவர்கள் பார்க்கும் நோயாளிகளின் எண்ணிக்கையுடன் இணைக்கும் இந்தச் சட்டத்தினால், அப்பகுதியைச் சேர்ந்த 24 குடும்ப மருத்துவர்கள் கியூபெக் மாகாணத்தை விட்டு வெளியேறினர்.
இதனை அடுத்து, அப்பகுதியில் சுமார் 15,000 க்கும் மேற்பட்ட பொதுமக்கள் குடும்ப மருத்துவர்கள் இன்றி பாதிக்கப்பட்டுள்ளனர்.
எனினும், இந்த சர்ச்சைக்குரிய சட்டம் கொண்டுவரப்படுவதற்கு முன்னரே அப்பகுதியில் மருத்துவர்களின் எண்ணிக்கை தேக்கமடைந்துவிட்டதாக அப்பகுதி பொது மருத்துவர்கள் சங்கத்தின் தலைவர் டாக்டர் கியோம் கார்போனோ (Guillaume Charbonneau) தெரிவித்துள்ளார்.
தற்போதைய தேவையைப் பூர்த்தி செய்யக் கூடுதலாக சுமார் 100 குடும்ப மருத்துவர்கள் தேவைப்படுவதாகக் குறிப்பிட்ட கார்போனோ, செப்டம்பர் 2026 நிலவரப்படி 123,200 க்கும் மேற்பட்ட நோயாளிகள் குடும்ப மருத்துவர்கள் இன்றி அவதிப்பட்டு வருவதாகச் சுட்டிக்காட்டியுள்ளார்.
