மொன்றியல் நகரில் அமைந்துள்ள மக்கில் பல்கலைக்கழகத்தில் (McGill University) கடந்த ஆண்டு நிறுத்தப்பட்ட ஆண்கள் மற்றும் பெண்களுக்கான தடகள (Track and Field) விளையாட்டுப் பிரிவு, அடுத்த ஆண்டு முதல் மீண்டும் செயல்பாட்டிற்கு வரக்கூடும் என எதிர்பார்க்கப்படுகிறது.
பல்கலைக்கழகத்தின் தடகள மற்றும் பொழுதுபோக்கு மூலோபாய திட்டமிடல் சிறப்புக் குழு, இது குறித்த சாதகமான பரிந்துரையை முன்வைத்துள்ளது.
கடந்த ஆண்டு உள்ளகக் கணக்காய்வு மற்றும் வெளிப்புற மதிப்பீடுகளைத் தொடர்ந்து, வளப்பற்றாக்குறைவைக் காரணம் காட்டி மக்கில் பல்கலைக்கழகம் ஓட்டப்பந்தயம், மல்யுத்தம், மற்றும் பேட்மிட்டன் உள்ளிட்ட 25 விளையாட்டு அணிகள் மற்றும் கழகங்களை ரத்து செய்வதாக அறிவித்திருந்தது.
இந்தத் திடீர் முடிவு நூற்றுக்கணக்கான மாணவ வீரர்களைப் பாதித்திருந்தது.
மேலும், கனடிய தடகளச் சங்கம் (Athletics Canada) மற்றும் ஒலிம்பிக் வீரர் புருனி சுரின் (Bruny Surin) போன்ற பலரின் கடுமையான விமர்சனங்களுக்கும் இந்த நடவடிக்கை ஆளாகியிருந்தமை குறிப்பிடத்தக்கது.
