கியூபெக் மாகாணச் சட்டசபைத் தேர்தலுக்காக 39 நாட்கள் நீடித்த பிரசார காலத்தின்போது தாம் சில விடயங்களை வேறுவிதமாகச் செய்திருக்க வேண்டும் என, ஆளும் ‘கூட்டணி அவெனீர் கியூபெக்’ (CAQ) கட்சியின் தலைவரும் மாகாண முதல்வருமான கிறிஸ்டின் பிரஷெட் தெரிவித்துள்ளார்.
ஷாவினிகன் நகரில் நடைபெற்ற பிரசார நிகழ்வொன்றில் உரையாற்றியபோதே அவர் இதனைத் தெரிவித்தார்.
எதிர்க்கட்சியான ‘பார்ட்டி கியூபெக்வா‘ (PQ) வெற்றிபெற்றால் கியூபெக் மாகாணத்தை தனிநாடாக்குவது தொடர்பான பொதுவாக்கெடுப்பை நடத்தும் என உறுதியளித்துள்ளது எனவும் இந்த வாக்கெடுப்பினால் ஏற்படக்கூடிய அரசியல் மற்றும் பொருளாதாரப் பாதிப்புகள் குறித்து, தாம் பிரசாரத்தின்போது போதுமான அளவு முக்கியத்துவம் கொடுத்துப் பேசத் தவறிவிட்டதாகவும் கிறிஸ்டின் பிரஷெட் வருத்தம் வெளியிட்டார்.
பொதுவாக்கெடுப்பு குறித்த அச்சம் உடனடியாக பொருளாதாரத்தில் நிச்சயமற்ற தன்மையை உருவாக்கும் எனக் குறிப்பிட்ட அவர், கியூபெக் மக்கள் இதன் தீவிரத்தைப் புரிந்துகொள்வது அவசியம் என்று குறிப்பிட்டுள்ளார்.
அதேபோன்று, தமது கட்சியின் வாக்குறுதிகளைப் பற்றி விரிவாக விளக்குவதில் அதிக நேரம் செலவிட்டதாகவும், எதிர்க்கட்சிகளுடனான முக்கிய வேறுபாடுகளை மக்களிடம் தெளிவாகக் கொண்டுசேர்க்கவில்லை என்றும் கிறிஸ்டின் பிரஷெட் சுட்டிக்காட்டினார்.
மேலும், தொலைக்காட்சி விவாதங்களின்போது எதிர்க்கட்சிகளின் தாக்குதல்களுக்குத் தாம் அளவுக்கு அதிகமாகப் பதிலடி கொடுக்க முயன்றதாகவும் அவர் தெரிவித்தார்.
வாழ்க்கைச் செலவினங்களைக் குறைத்தல், பொதுச் சேவைகளை மேம்படுத்துதல் மற்றும் கியூபெக்கின் பொருளாதாரம் மற்றும் அடையாளத்தைப் பாதுகாத்தல் ஆகியவற்றை மையமாகக் கொண்டு பிரஷெட் தமது இறுதிக்கட்ட வாக்கு சேகரிப்பில் ஈடுபட்dஇருந்தமை குறிப்பிடத் தக்கது.
