அமெரிக்காவுக்கும் கனடாவுக்கும் இடையிலான வர்த்தகப் பதற்றம் தொடர்ந்து நீடித்து வரும் நிலையில், புதிய அமெரிக்க வரிகள் கனடாவின் பொருளாதார வளர்ச்சியை பாதிக்கக்கூடும் என Bank of Canada ஆளுநர் Tiff Macklem எச்சரித்துள்ளார்.
அமெரிக்காவின் புதிய வர்த்தக நடவடிக்கைகள் தொடர்ந்தால், 2026ஆம் ஆண்டின் நான்காவது காலாண்டில் கனடாவின் பொருளாதார வளர்ச்சி ஒரு சதவீதத்திற்கும் கீழ் குறையக்கூடும் என அவர் தெரிவித்துள்ளார்.
முன்னதாக, இரண்டாவது காலாண்டில் கனடாவின் பொருளாதாரம் வருடாந்திர அடிப்படையில் 3.3 சதவீத வளர்ச்சியை பதிவு செய்திருந்தது.
எனினும், அமெரிக்காவுடனான வர்த்தக பேச்சுவார்த்தைகளில் ஏற்பட்ட பின்னடைவும், புதிய வரிகளும் நிறுவனங்களின் முதலீடு மற்றும் புதிய பணியமர்த்தல் நடவடிக்கைகளை தாமதப்படுத்தக்கூடும் என Bank of Canada தெரிவித்துள்ளது.
இதற்கிடையில், கனடாவில் பணவீக்கம் சுமார் 3 சதவீதமாக உள்ள நிலையில், மத்திய வங்கியின் இலக்கு 2 சதவீதமாகும்.
வர்த்தக நிச்சயமற்ற தன்மை, எரிபொருள் விலை மற்றும் உலகளாவிய பொருளாதார சூழல் ஆகியவை கனடாவின் அடுத்தகட்ட பொருளாதார நிலவரத்தில் முக்கிய தாக்கத்தை ஏற்படுத்தக்கூடும் என எதிர்பார்க்கப்படுகிறது.
