கூகுள் மேப்ஸ் (Google Maps) நிறுவனத்தின் சமீபத்திய புதுப்பித்தலைத் தொடர்ந்து, ஒன்டாரியோ மாகாண அரசாங்கத்தின் பல அதிகாரப்பூர்வ இணையதளங்களில் ஒன்டாரியோ ஏரியானது லேக் அமெரிக்கா (Lake America) எனக் காட்சிப்படுத்தப்பட்டது.
இந்த சம்பவம் அரசியல் தளத்திலும் சமூகத்தளங்களிலும் பெரும் பரபரப்பை ஏற்படுத்தியுள்ளது. இதையடுத்துத் துரிதமாகச் செயல்பட்ட கனடிய அதிகாரிகள்,
வரைபடங்களில் மீண்டும் லேக் ஒன்டாரியோ (Lake Ontario) என்ற பழமையான பெயரையே மீட்டெடுத்துள்ளனர்.
மூன்றாம் தரப்பு வரைபடச் சேவைகளைப் (Third-party mapping services) பயன்படுத்தியதன் விளைவாகவே இந்நிலை ஏற்பட்டதாகத் தெரிவித்த அரசு
அதிகாரிகள், அனைத்து அரசு இணையதளங்களிலும் லேக் ஒன்டாரியோ என்ற சரியான பெயரே இடம் பெறுவதை உறுதிசெய்துள்ளனர். அமெரிக்க அதிபர் டொனால்ட் டிரம்ப் பிறப்பித்த நிர்வாக உத்தரவையும், அமெரிக்க புவியியல் பெயர்கள் தகவல் அமைப்பின் (GNIS) அதிகாரப்பூர்வ மாற்றத்தையும் தொடர்ந்து, அமெரிக்காவிலுள்ள பயனர்களுக்கு ஒன்டாரியோ ஏரியின் பெயர் லேக் அமெரிக்கா எனக் காண்பிக்கப்படும் என கூகுள் நிறுவனம் அறிவித்திருந்தது.
கூகுள் மேப்ஸின் இந்தத் தானியங்கி மென்பொருள் மூலமான புதுப்பித்தற் செயற்பாடு காரணமாக, மெட்ரோலின்க்ஸ் (Metrolinx), ஹைட்ரோ ஒன் (Hydro One) மற்றும் எல்.சி.பி.ஓ (LCBO) உள்ளிட்ட ஒன்டாரியோ மாகாண நிறுவனங்களின் இணையதளங்களில் உள்ள வரைபடங்களில் ஏரியின் பெயர் தவறுதலாக லேக் அமெரிக்கா என மாறியது. இது குறித்து உடனடியாக விளக்கமளித்த ஒன்டாரியோவின் பொது மற்றும் வணிகச் சேவைகள் வழங்கல் அமைச்சர்,சில மாகாண அரசு
நிறுவனங்களின் இணையதளங்கள் கூகுள் மேப்ஸிலிருந்து நேரடியாகத் தரவுகளைப் பெறுகின்றன. கூகுளின் மாற்றத்தைத் தொடர்ந்து, எங்களது அனைத்து இணையதளங்களிலும் லேக் ஒன்டாரியோ என்ற சரியான பெயர் இருப்பதை உறுதி செய்ய நடவடிக்கைகளை மேற்கொண்டு வருவதாகத் தெரிவித்துள்ளார்.
அமெரிக்காவிற்கும் கனடாவிற்கும் இடையே தீவிரமடைந்து வரும் வர்த்தகப் போரின் பின்னணியில், வரலாற்றுச் சிறப்புமிக்க இந்த ஏரியின் பெயரை
மாற்ற அமெரிக்க அதிபர் டிரம்ப் மேற்கொண்ட முயற்சிக்குக் கனடாவில் பலத்த எதிர்ப்புப் கிளம்பியுள்ளது. இது குறித்து கருத்து தெரிவித்த பிரதமர் மார்க் கார்னி, 400 ஆண்டுகளுக்கும் மேலான வரலாற்றைக் கொண்ட இந்த ஏரி, கனடியர்கள் மத்தியில் என்றும் லேக் ஒன்டாரியோ' என்றே அறியப்படும் எனத் தெரிவித்துள்ளார்.
கனடாவிற்கும் அமெரிக்காவிற்கும் இடையிலான எல்லையில் அமைந்துள்ள ஐந்து பெரிய ஏரிகளில் ஒன்றாக விளங்கும் ஒன்டாரியோ ஏரியின் பெயர், கனடாரியோ (Kanadario – அழகிய நீர்நிலை) என்ற பழங்குடியின மொழியிலிருந்து உருவானதாகும். சர்வதேச எல்லை நீர்நிலைகள் ஒப்பந்தத்தின் (Boundary Waters Treaty) கீழ்
இரு நாடுகளாலும் நிர்வகிக்கப்படும் இந்த ஏரியின் பெயரைத் தன்னிச்சையாக மாற்ற அமெரிக்காவிற்கு அதிகாரம் இல்லை என்றும், இத்தகைய பெயர்மற்றங்கள் கனடாவைக் கட்டுப்படுத்தாது என்றும் இராஜதந்திரிகள் சுட்டிக்காட்டியுள்ளனர்.
தற்போது மெட்ரோலின்க்ஸ் போன்ற முக்கிய அரசு அமைப்புகளின் தளங்களில் அந்த ஏரியின் பெயர் மாற்றப்பட்ட போதிலும், லோப்லாஸ் (Loblaws) போன்ற சில தனியார் வணிக நிறுவனங்களின் கிளை கண்டறியும் வரைபடங்களில் இன்னும் குறித்த ஏரியானது லேக் அமெரிக்கா என்றே காண்பிக்கப்பட்டு வருவது குறிப்பிடத்தக்கது.
