அபுதாபி தேசிய கண்காட்சி மைய குழுமத்தின் சார்பில் கடந்த ஆகஸ்ட் 28-ஆம் தேதி முதல் சர்வதேச வேட்டை மற்றும் குதிரையேற்ற கண்காட்சி மிக பிரம்மாண்டமாக நடைபெற்று வருகிறது.
அமீரக பாரம்பரியத்தையும் கலாச்சாரத்தையும் வெளிப்படுத்தும் இந்த நிகழ்வில், உலகின் பல்வேறு நாடுகளைச் சேர்ந்த 55 முன்னணி பறவை வளர்ப்பு பண்ணைகள் பங்கேற்று தங்கள் அரிய வகை விலங்குகளையும் பறவைகளையும் காட்சிப்படுத்தி ஏலத்தில் விட்டு வருகின்றன.
இதில் பறவை ஆர்வலர்களின் பெரும் கவனத்தை ஈர்த்த அமெரிக்காவில் தீவிர பராமரிப்பில் வளர்க்கப்பட்ட ‘கார்மூஷா பியூர் அல்ட்ரா வொயிட்’ ரகத்தைச் சேர்ந்த அரிய வகை வெள்ளை நிற பால்கன் பறவை விறுவிறுப்பான ஏலத்தின் முடிவில் ரூ.3 கோடியே 90 லட்சத்திற்கு (சுமார் 4 கோடி ரூபாய்) விற்பனையானது.
தூய்மையான பளபளக்கும் வெள்ளை நிறம், 1 கிலோ எடை மற்றும் 16.5 அங்குலம் நீளத்துடன் கம்பீரமாக தோற்றமளிக்கும் இந்த அரிய பால்கன், நடப்பு ஆண்டின் ஏலத்திலேயே மிக அதிக விலைக்கு விற்பனையாகி புதிய சாதனையைப் படைத்துள்ளது.
