ஒன்ராறியோ மாகாணத்தின் நகரங்கள், சிற்றூர்கள் மற்றும் கிராமப்புறங்களைச் சேர்ந்த ஆயிரக்கணக்கான நகராட்சி பிரதிநிதிகள் பங்கேற்கும் Association of Municipalities of Ontario – AMO வருடாந்த மாநாடு ஒட்டாவாவில் ஆரம்பமாகிறது.
இந்த ஆண்டு சாதனை அளவிலான பிரதிநிதிகள் பங்கேற்பார்கள் என எதிர்பார்க்கப்படும் இந்த மாநாடு, புதன்கிழமை வரை நடைபெறவுள்ளது.
ஒட்டாவாவின் Rogers Centre-ல் நடைபெறும் மாநாட்டில், நகராட்சி நிர்வாகங்கள் எதிர்கொள்ளும் வீடற்றோர் பிரச்சினை, பழைய உட்கட்டமைப்புகள் மற்றும் அதிகரித்து வரும் சேவைச் செலவுகள் உள்ளிட்ட முக்கிய விவகாரங்கள் குறித்து விவாதிக்கப்படவுள்ளன.
நகராட்சிகளுக்கு நீண்டகால மற்றும் முன்கூட்டியே திட்டமிடக்கூடிய நிதியுதவியை வழங்குமாறு மாகாண அரசிடம் உள்ளூர் நிர்வாகத் தலைவர்கள் வலியுறுத்த உள்ளனர்.
வெளியேறும் AMO தலைவர் Robin Jones, வீடமைப்பு மற்றும் பொருளாதார வளர்ச்சிக்காக நீண்டகால உட்கட்டமைப்பு நிதி அவசியம் என தெரிவித்துள்ளார்.
அத்துடன், சுகாதாரம் மற்றும் சமூக சேவைகள் மாகாண அரசின் பொறுப்புகளாக இருந்தபோதிலும், அவற்றுக்கான செலவுச் சுமைகள் அண்மைய ஆண்டுகளில் நகராட்சிகளுக்கு மாற்றப்பட்டுள்ளதாகவும் அவர் சுட்டிக்காட்டியுள்ளார்.
இந்தச் செலவுகளை ஈடுகட்ட நகராட்சிகள் பெரும்பாலும் சொத்து வரி வருவாயை மட்டுமே நம்பியிருக்க வேண்டிய நிலை ஏற்பட்டுள்ளதாகவும் தெரிவிக்கப்பட்டுள்ளது.
ஒன்ராறியோவில் மக்கள் தொகை வளர்ச்சி, காலநிலை மாற்றத்தின் தாக்கம் மற்றும் பழமையான சாலைகள், குடிநீர் அமைப்புகள் உள்ளிட்ட உட்கட்டமைப்புகளை பராமரிப்பதற்காக அடுத்த 10 ஆண்டுகளில் 250 பில்லியன் டொலருக்கும் அதிகமான முதலீடு தேவைப்படும் என AMO மதிப்பிட்டுள்ளது.
மேலும், சமூக வீடமைப்பு, மனநல சேவைகள் மற்றும் போதைப்பொருள் அடிமைத்தன சிகிச்சை சேவைகளுக்காக கூடுதல் மாகாண நிதியுதவி வழங்க வேண்டும் என்றும் நகராட்சி பிரதிநிதிகள் கோரிக்கை விடுக்க உள்ளனர்.
நீண்டகால வீடற்றோர் பிரச்சினையை முடிவுக்கு கொண்டுவருவதற்கு அடுத்த 10 ஆண்டுகளில் சுமார் 11 பில்லியன் டொலர் தேவைப்படும் என்றும் மதிப்பிடப்பட்டுள்ளது.
இந்த ஆண்டு மாநாடு ஒன்ராறியோவில் தேர்தல் நடைபெறவுள்ள ஆண்டில் இடம்பெறுவதால், அதற்கு அரசியல் முக்கியத்துவமும் ஏற்பட்டுள்ளது. எதிர்வரும் அக்டோபரில் வாக்காளர்களை சந்திக்கவுள்ள நகர மேயர்கள் மற்றும் கவுன்சிலர்களும் இதில் பங்கேற்கின்றனர்.
ஒன்ராறியோ பிரதமர் Doug Ford, திங்கட்கிழமை காலை மாநாட்டு பிரதிநிதிகள் மத்தியில் உரையாற்றவுள்ளார். அதற்கு முன்னதாக ஒட்டாவா மேயர் Mark Sutcliffe உரையாற்ற உள்ளார்.
இதனிடையே, Robin Jones தனது பதவியை ஒட்டாவா நகர கவுன்சிலர் Riley Brockington-க்கு ஒப்படைக்கவுள்ளமை குறிப்பிடத்தக்கது.
