கியூபெக் மாகாணத்தின் புதிய முதல்வர் கிறிஸ்டின் பிரெச்செட் (Christine Fréchette), தனது தலைமையிலான புதிய அரசாங்கத்தின் சாதனைகளை முன்னிறுத்தி, எதிர்வரும் பொதுத்தேர்தலுக்கான பிரசாரத்தைத் தனது கட்சி உறுப்பினர்களிடையே தொடங்கியுள்ளார்.
கியூபெக் மாகாணத்தின் 33-வது முதல்வராகப் பதவியேற்று இரண்டு வாரங்களே ஆன நிலையில், ‘சி.ஏ.கியூ’ (CAQ) கட்சியின் முக்கியக் கூட்டத்தில் கிறிஸ்டின் பிரெச்செட் உரையாற்றினார்.
“வெறும் 14 நாட்களில் இத்தனை மாற்றங்களைக் கொண்டுவர முடியுமென்றால், அடுத்து வரும் நான்கு ஆண்டுகளில் எங்களால் எதைச் சாதிக்க முடியும் என்பதைக் கற்பனை செய்து பாருங்கள்” என அவர் விடுத்த அறைகூவல், கட்சியினரிடையே பெரும் உற்சாகத்தை ஏற்படுத்தியுள்ளது.
பல ஆண்டுகளாக இழுபறியில் இருந்த ‘மெய்சோனேவ்-ரோஸ்மாண்ட்’ (Maisonneuve-Rosemont) மருத்துவமனை புனரமைப்புத் திட்டத்திற்கு 700 மில்லியன் டொலர் நிதியை ஒதுக்கிய கிறிஸ்டின் பிரெச்செட், அத்திட்டத்தைச் செயல்படுத்தத் தொடங்கியுள்ளார்.
சிறப்பு மருத்துவர் சங்கங்களுடன் நீண்டகாலமாக நிலவி வந்த கருத்து வேறுபாடுகளை நீக்கியுள்ள அவர், அந்த மருத்துவர்களுடன் புதிய உடன்படிக்கையை எட்டியுள்ளார்.
கியூபெக்கின் முன்னாள் முதல்வர் பிரான்சுவா லெகோவின் 8 ஆண்டுகால ஆட்சிக்குப் பிறகு, கட்சிக்கு “புதிய உயிர்” கிடைத்துள்ளதாகப் பிரெச்செட் குறிப்பிட்டுள்ளார்.
