கியூபெக் லிபரல் கட்சியின் புதிய தலைவர் சார்லஸ் மில்லியார்ட் (Charles Milliard), மாகாணத்தின் கடுமையான மொழிச் சட்டமான Bill 96-க்கு ஆதரவாகக் கருத்துத் தெரிவித்தமை, கியூபெக்கில் வாழும் சிறுபான்மை மக்களிடையே கடும் அதிருப்தியை ஏற்படுத்தியுள்ளது.
அண்மையில் நடைபெற்ற ஊடகவியலாளர் சந்திப்பில் பேசிய மில்லியார்ட், கியூபெக்கில் லிபரல் கட்சி ஆட்சிக்கு வந்தால், பிரெஞ்சு மொழியைப் பாதுகாக்கும் ‘பில் 96’ சட்டத்தின் ‘Notwithstanding Clause’ எனப்படும் சிறப்பு அதிகாரத்தைப் பயன்படுத்தத் தயங்கப் போவதில்லை எனத் தெரிவித்தார்.
இந்தச் சிறப்பு அதிகாரம், தனிமனித அடிப்படை உரிமைகளை மீறும் சட்டப் பிரிவுகளையும் நீதிமன்ற விசாரணைகளில் இருந்து பாதுகாக்க வழிவகை செய்கிறது.
லிபரல் கட்சியின் பாரம்பரிய ஆதரவாளர்களான ஆங்கிலம் பேசுவோர், இதனைத் தங்களுக்கு இழைக்கப்பட்ட ‘துரோகம்’ எனக் கருதுகின்றனர்.
கியூபெக் மாகாணத்தின் லிபரல் கட்சியானது சிறுபான்மையினரின் உரிமைகளைப் பாதுகாக்கும் கட்சியாகவே நீண்டகாலமாகப் பார்க்கப்பட்டது.
ஆனால், தற்போது பிரெஞ்சு மொழி பேசும் மக்களின் வாக்குகளைக் கவர்வதற்காக, அந்தக் கட்சி தனது கொள்கையில் இருந்து பின்வாங்குவதாகக் குற்றம் சாட்டப்படுகின்றமை குறிப்பிடத்தக்கது.
