மொன்றியல் பெருநகரப் பகுதியின் அதிவேக இலகு இரயில் போக்குவரத்து அமைப்பான ஆர்.இ.எம் (Réseau express métropolitain – REM) அதன் செயல்பாடுகளுக்குப் பொறுப்பான பல்சர் (Pulsar) நிறுவனத்தின் பணிப்பாளர் நாயகம் (Director General) லோயிக் கோர்டெல் (Loïc Cordelle) அந்தப் பதவியிலிருந்து நீக்கப்பட்டுள்ளார்.
இலகு இரயில் போக்குவரத்து அமைப்பான ஆர்.இ.எம் வலையமைப்பில் அண்மைக்காலமாகத் தொடர்ந்து ஏற்பட்டு வந்த தொழில்நுட்பக் கோளாறுகள் மற்றும் சேவைத் தடங்கல்களைத் தொடர்ந்து, இந்த பதவிநீக்கம் முன்னெடுக்கப்பட்டுள்ளது.
நெரிசல் மிக்க காலை மற்றும் மாலை வேளைகளில் (Peak Hours) தொழில்நுட்பக் கோளாறுகளால் இரயில் சேவைகள் ஸ்தம்பித்ததால், பல்லாயிரக்கணக்கான பொதுமக்கள் நாளாந்தம் கடும் அசௌகரியங்களை எதிர்கொண்டனர்.
இது மாகாண அரச மட்டத்திலும், பொதுமக்கள் மத்தியிலும் பெரும் அதிருப்தியை ஏற்படுத்தியிருந்தது. புதிய இரயில் வழித்தடங்கள் விரிவாக்கம் செய்யப்பட்ட போதிலும், பயணிகளுக்குத் தடையற்ற நம்பகமான சேவையை வழங்குவதில் ஏற்பட்ட தொடர் பின்னடைவுகள் மற்றும் குளிர்காலப் பனிப்பொழிவு முகாமைத்துவத்தில் நிலவிய குளறுபடிகளுக்குப் பொறுப்பேற்கும் வகையிலேயே இந்த தலைமைத்துவ மாற்றம் நிகழ்ந்துள்ளது. பல்சர் (Pulsar) நிறுவனம், தனது செயல்பாட்டுப் பிரிவின் தலைமைத்துவத்தில் அவசர மாற்றத்தை மேற்கொண்டுள்ளதாக உத்தியோகபூர்வமாக அறிவித்துள்ளது.
