மொன்ட்ரியலுக்கு மேற்கே உள்ள ஹட்சன் நகரில் இயங்கி வந்த ஹட்சன் மருத்துவ நிலையம் (Hudson Medical Centre) அடுத்த ஆண்டு ஏப்ரல் மாதம் 1 ஆம் திகதி அன்று மூடப்பட உள்ளது.
கியூபெக் மாகாணத்தின் சர்ச்சைக்குரிய சட்டமூலமான Bill 2 நடைமுறைப் படுத்தப்பட்டதன் காரணமாகவே, இந்த மருத்துவ நிலையம் மூடப்பட வேண்டிய நிலைக்கு உள்ளாகியது என்று கூறப்படுகின்றது.
கடந்த ஒக்டோபர் 25 ஆம் திகதி முதல் நடைமுறையில் உள்ள இந்த Bill 2 சட்டம், மருத்துவர்களின் சம்பளத்தை அவர்கள் பரிசோதிக்கும் நோயாளிகளின் எண்ணிக்கை மற்றும் அவர்களின் பாதிப்புத் தன்மையின் அடிப்படையில் மதிப்பிடுகிறது.
வூட்ரூயில்-ஸௌலான்ஜஸ் (Vaudreuil-Soulanges) பிராந்தியத்தில், ஆங்கிலம் பேசுவோரை உள்ளடக்கிய சுமார் 11,000 நோயாளிகளுக்கு சேவை செய்து வந்த ஒரே இருமொழிச் சேவையளிக்கும் குடும்ப வைத்தியர் குழுமம் (GMF) இதுவாகும்.
Bill 2 எனப்படும் புதிய சட்டத்திற்கு எதிர்ப்பு தெரிவித்து, மருத்துவ நிலையத்தில் பணிபுரிந்த ஏழு மருத்துவர்களில் மூன்று பேர் மாகாணத்தை விட்டு வெளியேற முடிவு செய்டுள்ளனர்.
இதனாலேயே இந்த இக்கட்டான நிலை ஏற்பட்டுள்ளதாகக் மருத்துவ நிலையத்தின் இணை உரிமையாளர்களில் ஒருவரான டாக்டர் தாரா மெக்கார்ட்டி தெரிவித்துள்ளார்.
