கியூபெக் மாகாணத்தில் வருடத்திற்கு இருமுறை கடிகார நேரத்தை மாற்றும் நடைமுறையை நிரந்தரமாக முடிவுக்குக் கொண்டுவருவதற்கான நடவடிக்கைகளை புதிய மாகாண அரசாங்கம் முன்னெடுக்கவுள்ளது.
இதன்படி,இன்றைய தினம் அதிகாலை இரண்டு மணிக்கு கடிகாரங்கள் ஒரு மணிநேரம் பின்னோக்கி மாற்றப்பட்டு நிலையான நேரம் அமுலுக்கு வந்துள்ளது
எனினும், கியூபெக்கில் இந்த நேர மாற்றமே இறுதியாக இருக்கக்கூடும் என புதிய Parti Québécois அரசாங்கம் அறிவித்துள்ளது.
இது தொடர்பாக நீதித்துறை அமைச்சர் Marie-Claude Sarrazin, நேர மாற்ற நடைமுறையை முடிவுக்குக் கொண்டுவருவதற்கான சட்டமூலம் ஒன்றை அறிமுகப்படுத்தவுள்ளதாகத் தெரிவித்துள்ளார்.
இந்த நடைமுறையை மாற்றுவதற்கு முன்னதாக நிபுணர்கள், பொதுமக்கள் மற்றும் இதற்கு எதிர்ப்புத் தெரிவிப்போரின் கருத்துகளும் கேட்டறியப்படும் என அவர் குறிப்பிட்டுள்ளார்.
மேலும், எதிர்காலத்தில் கோடைக்கால நேரத்தை நிரந்தரமாகப் பயன்படுத்துவதா அல்லது நிலையான குளிர்கால நேரத்தைப் பயன்படுத்துவதா என்பது குறித்தும் ஆராயப்படவுள்ளது.
இதற்கிடையில், நேர மாற்றம் காரணமாக அதிகாலை நேரங்களில் இருள் அதிகரிப்பது பாடசாலை மாணவர்கள், கட்டுமானத் தொழிலாளர்கள் உள்ளிட்டோரின் பாதுகாப்பு தொடர்பில் கவலைகளை ஏற்படுத்தியுள்ளது.
அதேவேளை, அமெரிக்காவுடனான எல்லைப் போக்குவரத்தில் குழப்பங்களைத் தவிர்ப்பதற்காக கனடா எல்லைச் சேவைகள் முகமை தனது 26 தரைவழி எல்லைக் கடப்பிடங்களில் பணிநேரங்களைச் சீரமைத்துள்ளதாகவும் தெரிவிக்கப்பட்டுள்ளது.
எனவே, கியூபெக்கில் நேர மாற்ற நடைமுறைக்கு நிரந்தரமாக முற்றுப்புள்ளி வைக்கப்படுமா என்பது குறித்த எதிர்பார்ப்பு மக்கள் மத்தியில் அதிகரித்துள்ளது.
