செயிண்ட் லாரன்ஸ் (St. Lawrence) நதியில் இடம்பெற்ற சட்டவிரோதப் படகுச் சவாரியின் போது கொலம்பியச் சுற்றுலாப் பயணி ஒருவர் நீரில் மூழ்கி உயிரிழந்த சம்பவத்தில், மத்திய போக்குவரத்து அமைச்சகம் (Transport Canada) தனது வணிகச் சேவைகளை நிறுத்துமாறு எந்தவொரு கட்டளையும் பிறப்பிக்கவில்லை என்று குற்றஞ்சாட்டப்பட்ட யாட் (Yacht) படகுக்கான கப்டன், மொன்றியல் நீதிமன்றத்தில் தெரிவித்துள்ளார்.
63 வயதான ஜீன்-பியர் அலாரி (Jean-Pierre Alarie) என்ற இப் படகுக் கப்டன் மீது, கவனக் குறைவாகச் செயல்பட்டு மரணத்தை விளைவித்ததாகக் (Criminal negligence causing death) குற்றம் சாட்டப்பட்டு மொன்றியல் நீதிமன்றத்தில் வழக்கு விசாரணை நடைபெற்று வருகின்றது.
நீதிமன்றத்தில் சாட்சியமளித்த படகுக் கப்டன் ஜீன்-பியர் அலாரி, மத்திய போக்குவரத்து அமைச்சு தனக்குச் சில சட்ட நடைமுறைகள் மற்றும் விதிமுறைகள் குறித்து அறிவிப்புகளை அனுப்பிய போதிலும், வணிக ரீதியிலான சுற்றுப்பயணங்களை முழுமையாக நிறுத்தக் கோரும் முறையான இடைநிறுத்த உத்தரவையோ அல்லது தடையையோ வழங்கவில்லை என்று குறிப்பிட்டுள்ளார்.
அமைச்சகத்தின் முறையான தடை உத்தரவு இல்லாத காரணத்தினாலேயே, தான் தொடர்ந்து படகுச் சவாரிச் சேவைகளை வழங்கி வந்ததாக அவர் தனது தரப்பு விளக்கத்தில் தெரிவித்துள்ளார்.
கடந்த 2024 ஆம் ஆண்டு ஜூலை மாதம் 6 ஆம் திகதி அன்று இரவு, 20 பேருடன் செயிண்ட் லாரன்ஸ் நதியில் அந்தப் படகு, பயணித்தது.
அப்படகில் பயணித்த வில்லியன் எட்வார்டோ சாண்டாண்டர் டி லா ஹோஸ் (William Eduardo Santander de la Hoz) என்ற 33 வயதான கொலம்பியச் சுற்றுலாப் பயணி, அந்தப் பயணத்தின் போது நீரில் விழுந்து உயிரிழந்தார்.
இச் சம்பவம் தொடர்பாக அரசுத் தரப்பு வழக்கறிஞர் வாதிடுகையில், படகுக் கப்டன் எவ்வித உரிய அனுமதிப்பத்திரமோ (Permit) அல்லது பாதுகாப்பான பயன்பாட்டிற்கான உரிமங்களோ இன்றி சட்டவிரோதமாக வர்த்தக நோக்கிலான படகுச் சவாரிகளை நடத்தியுள்ளதாகக் குற்றஞ்சாட்டியுள்ளமை குறிப்பிடத்தக்கது.
