தேர்தல் வழிகாட்டி ஆவணங்கள் மற்றும் வாக்காளர் தகவல் அட்டைகள் பிரெஞ்சு மொழியில் மட்டுமே அச்சிடப்படும் என்ற முடிவுக்கு எதிராக கியூபெக் அரசாங்கத்தின் மீது நீதிமன்றம் மூலமாக சட்ட நடவடிக்கை எடுக்க வழக்கறிஞர்கள் குழுவொன்று ஆயத்தமாகி வருகிறது.
கியூபெக் மாகாணத்தின் சர்ச்சைக்குரிய பிரெஞ்சு மொழிச் சட்டமான ‘சட்டம் 96’ (Bill 96) காரணமாகவே, முதன்முறையாகத் தேர்தல் ஆவணங்கள் அனைத்தும் பிரெஞ்சு மொழியில் மட்டுமே அனுப்பப்படுவதாக ‘எலெக்ஷன்ஸ் கியூபெக்’ (Élections Québec) எனப்படும் தேர்தல் ஆணையம் அதிகாரப்பூர்வமாக அறிவித்திருந்தது.
வாக்களிக்கும் முறை, வாக்குச்சாவடி விபரங்கள் போன்ற அத்தியாவசியத் தகவல்களை ஆங்கிலத்தில் வழங்க மறுக்கின்றமையானது, வாக்காளர்களின் அடிப்படை ஜனநாயக உரிமையைப் பறிப்பதாக வழக்கறிஞர்கள் குற்றம் சாட்டியுள்ளனர்.
கியூபெக் அரசை எதிர்த்து வழக்குத் தயாரிப்பில் ஈடுபட்டுள்ள முன்னணி வழக்கறிஞர்களில் ஒருவரான எரிக் மால்டாஃப் (Eric Maldoff) இது தொடர்பாகக் கருத்துத் தெரிவிக்கையில், “வாக்களிக்கும் அடிப்படை ஜனநாயக உரிமையை விட, கியூபெக்கின் பிரெஞ்சு மொழிச் சட்டம் மேலானது அல்ல.” எனவும் ”நாட்டின் அரசியலமைப்பு வழங்கியுள்ள வாக்குரிமையை இத்தகைய தன்னிச்சையான நிபந்தனைகள் மூலம் முடக்க முடியாது” எனவும் தெரிவித்துள்ளார்.
மேலும், பிரெஞ்சு மொழி ஆவணங்களில் வழங்கப்பட்டுள்ள ‘க்யூ.ஆர் குறியீடு’ (QR Code) மூலம் இணையதளத்தில் ஆங்கிலத் தகவல்களைப் பெறலாம் எனத் தேர்தல் ஆணையம் கூறுவது ஏற்றுக்கொள்ள முடியாதது என்றும், தொழில்நுட்பப் பரிச்சயம் இல்லாத, சிறுபான்மையினத்தின் முதியவர்கள் மற்றும் எளிய வாக்காளர்களுக்கு இது பெரும் தடையை ஏற்படுத்தும் என்றும் வழக்கறிஞர்கள் சுட்டிக்காட்டியுள்ளனர்.
