மொன்றியல் நகரில் அமைந்துள்ள புகழ்பெற்ற கொன்கோர்டியா பல்கலைக்கழகம் (Concordia University) கடுமையான நிதி நெருக்கடியில் உள்ளதாகத் தெரிவிக்கப்பட்டுள்ளது.
அதன் காரணமாக, அந்தப் பல்கலைக்கழக நிர்வாகம் ஆனது, ஊழியர்களைக் கட்டாயப் பணிநீக்கம் செய்யவுள்ளதாகவும், சில கல்வித் திட்டங்களைக் குறைக்கவுள்ளதாகவும் உத்தியோகபூர்வமாக அறிவித்துள்ளது.
பல்கலைக்கழகத்தின் அனைத்துத் திணைக்களங்களிலும் 6 சதவீத நிதிக் குறைப்புக்களைச் செய்த போதிலும், வரவிருக்கும் 2026-27 நிதியாண்டில் சுமார் 20.7 மில்லியன் டொலர் வரவு-செலவுத் திட்டப் பற்றாக்குறையை (Deficit) எதிர்கொள்ள வேண்டியிருக்கும் என, அறிவிக்கப்பட்டுள்ளது.
கொன்கோர்டியா பல்கலைக்கழகத்தின் தலைவர் கிரஹாம் கார் (Graham Carr) ஊழியர்கள் மற்றும் மாணவர்களுக்கு அனுப்பியுள்ள விசேட சுற்றறிக்கையில் இந்தத்தகவலை வெளியிட்டுள்ளார்.
பல்கலைக்கழகத்தின் தற்போதைய நிதிப் பொறுப்புக்களை நிறைவேற்ற வேண்டுமாயின், வேறு வழியின்றி, பணிநீக்கங்களை அரங்கேற்ற வேண்டிய கட்டாயம் ஏற்பட்டுள்ளதாக அவர் குறிப்பிட்டுள்ளார்.
கொன்கோர்டியா பல்கலைக்கழகத்தின் வருவாய் திடீரென வீழ்ச்சியடைந்து, நிர்வாகச் செலவுகள் தொடர்ந்து அதிகரித்து வருவதே, இந்த நிதி நெருக்கடிக்கு முதன்மைக் காரணியாகக் கூறப்படுகிறது.
