”கியூபெக் மாநிலத்தின் சர்ச்சைக்குரிய மொழிச் சட்டமான Bill 96’ -இனை முற்றிலும் ரத்து செய்வோம்” என்ற தனது பழைய வாக்குறுதியிலிருந்து கன்சர்வேட்டிவ் கட்சித் தலைவர் எரிக் துஹைம் (Éric Duhaime) பின்வாங்கியுள்ளார்.
2026-ஆம் ஆண்டு நடைபெறவுள்ள கியூபெக் மாநிலத் தேர்தலை முன்னிட்டு, இந்த பின்வாங்கும் தீர்மானத்தை அவர் மேற்கொண்டுள்ளார். முன்னதாக, 2022 தேர்தலின் போது இந்தச் சட்டத்தை முழுமையாக ஒழிப்பதாகக் கூறி ஆங்கிலம் பேசும் மக்களின் ஆதரவைப் பெற்ற ஒரே தலைவர் இவராவார்.
ஆனால், தற்போது இந்த Bill 96’ சட்டத்தை முழுமையாக நீக்குவதற்குப் பதிலாக, அதில் உள்ள சில கடுமையான விதிகளை மட்டும் திருத்தம் (Amend) செய்யப் போவதாக அவர் அறிவித்துள்ளார்.
புதிய குடியேறிகள் கனடா வந்து ஆறு மாதங்களுக்குள் பிரெஞ்சு மொழியைக் கற்க வேண்டும் என்ற கட்டாய நிலை, மற்றும் சிறு வணிகங்கள் மீது திணிக்கப்பட்டுள்ள நிர்வாகச் சுமைகள் போன்றவற்றைத் திருத்தப்போவதாக துஹைம் குறிப்பிட்டுள்ளார்.
இந்த Bill 96’ சட்டத்தை முழுமையாக ரத்து செய்வது தற்போதைய சூழலில் யதார்த்தமானது அல்ல என்றும் அவர் சுட்டிக்காட்டியுள்ளார். கியூபெக்கில் பிரெஞ்சு மொழியைப் பாதுகாப்பதே இந்தச் சட்டத்தின் நோக்கம் என்றாலும், அது சிறுபான்மையினரின் உரிமைகளைப் பாதிப்பதாகப் புகார்கள் உள்ளன.
குறிப்பாக, அரசாங்கம் நீதிமன்றத் தலையீடுகளைத் தவிர்க்க Notwithstanding Clause என்ற சிறப்பு அதிகாரத்தைப் பயன்படுத்துவதைதுஹைம் விமர்சித்துள்ளார். தனது கட்சி ஆட்சிக்கு வந்தால், பிரெஞ்சு மொழியைப் பாதுகாப்பதோடு ஆங்கிலம் பேசும் மக்களின் உரிமைகளையும் சமமாகப் பேணும் வகையில் சட்டத்திருத்தங்கள் அமையும் என அவர் உறுதியளித்துள்ளார்.
கியூபெக் மாகாண கன்சர்வேட்டிவ் கட்சியின் இந்தத் திடீர் கொள்கை மாற்றம், அக்கட்சியை ஆதரித்த ஆங்கிலம் பேசும் மக்களிடையே அதிர்ச்சியை ஏற்படுத்தியுள்ளது.
