கியூபெக்கின் செண்ட் லாரன்ஸ் ஆற்றில் (St. Lawrence River) இயந்திரக் கோளாறு காரணமாகத் தரைதட்டி, கிட்டத்தட்ட நான்கு வாரங்களாகச் சிக்கியிருந்த ‘ஒனேகோ ஒட்ரா‘ (Onego Otra) என்ற சரக்குக் கப்பல் வெற்றிகரமாக மீட்கப்பட்டுள்ளது.
இழுவைப்படகுகளின் (Tugboats) உதவியுடன் மீட்கப்பட்ட இக்கப்பல், ஆய்வுகளுக்காக அருகில் உள்ள துறைமுகத்திற்குப் பாதுகாப்பாகக் கொண்டு செல்லப்பட்டுள்ளது.
அன்டிகுவா மற்றும் பார்புடா (Antigua and Barbuda) நாட்டின் கொடியுடன் பயணித்த 146 மீட்டர் நீளமுடைய இந்த ஜெனரல் சரக்குக் கப்பல், கடந்த ஜூன் 30 ஆம் திகதி மொன்றியல் நகரிலிருந்து நியூ ஓர்லீன்ஸ் நோக்கிச் சென்றபோது, சுக்கான் (Rudder) பகுதியில் ஏற்பட்ட தொழில்நுட்பக் கோளாறு காரணமாக மொன்றியலுக்கு வடகிழக்கே உள்ள கொன்றேகர் (Contrecoeur) பகுதியில் தரைதட்டியது.
கப்பலை மீட்பதற்காகக் கனடிய கடலோரக் காவல் படை மற்றும் ‘ஓசன் குரூப்’ (Ocean Group) நிறுவனத்தின் இழுவைப்படகுகள் இணைந்து தொடர் முயற்சிகளை மேற்கொண்டன.
முதல்கட்டமாக ஜூலை நடுப்பகுதியில் கப்பலின் எடையைக் குறைப்பதற்காக அதில் இருந்த சுமார் 2,720 மெட்ரிக் தொன் சரக்குகள் பிற படகுகளுக்கு மாற்றப்பட்டன.
முதல் மீட்பு முயற்சி தோல்வியில் முடிவடைந்த போதிலும், தொடர் முயற்சிகளின் பலனாக மூன்று சக்திவாய்ந்த இழுவைப்படகுகள் மூலம் கப்பல் மிதக்க வைக்கப்பட்டு, தற்போது மீட்கப்பட்டுள்ளது.
