மொன்றியல் நகரின் கிழக்குப் பகுதியில் உள்ள இரும்பு மறுசுழற்சி நிலையத்தில் ஏற்பட்ட பயங்கரத் தீ விபத்தைத் தொடர்ந்து, அந்த நிறுவனத்தின் இயங்கு உரிமத்தை (Operating Permit) மொன்றியல் மாநகர சபை அதிரடியாக ரத்து செய்துள்ளது.
நேற்று அதிகாலை 5:45 மணியளவில் ‘அமெரிக்கன் அயர்ன் அண்ட் மெட்டல்’ (AIM) என்ற நிறுவனத்தின் வளாகத்தில் வைக்கப்பட்டிருந்த பழைய இரும்பு மற்றும் மின்கலங்கள் (Batteries) தீப்பற்றின.
ஒரு லித்தியம் மின்கலம் வெடித்ததே இந்தத் தீ விபத்திற்குக் காரணம் என ஆரம்பக்கட்ட விசாரணையில் தெரியவந்துள்ளது.
சுமார் 55 தீயணைப்பு வீரர்கள் பல மணிநேரம் போராடித் தீயைக் கட்டுக்குள் கொண்டு வந்தனர்.
தீ விபத்தினால் வெளியேறிய கரும்புகை மொன்றியல் நகரம் முழுவதும் பரவியது.
இதனால் நகரின் காற்று மண்டலம் கடுமையாகப் பாதிக்கப்பட்டது.
இதனைத் தொடர்ந்து, மொன்றியல் பொதுச் சுகாதாரத் துறை (Santé Montréal) அவசர எச்சரிக்கை ஒன்றை விடுத்தது.
பொதுமக்கள் வீடுகளுக்குள்ளேயே இருக்குமாறும், ஜன்னல்களை மூடி வைக்குமாறும் அறிவுறுத்தப்பட்டனர்.
இந்த விபத்தைத் தொடர்ந்து, அந்த நிறுவனத்தின் மீது மொன்றியல் மாநகர சபை கடும் நடவடிக்கை எடுத்துள்ளது.
