அல்பர்ட்டா மாகாண முதல்வர் டேனியல் ஸ்மித் (Danielle Smith), கியூபெக் மாகாணத்தை நோக்கி ஒரு முக்கிய கோரிக்கையை விடுத்துள்ளார்.
“கடந்த கால தயக்கங்களை மறந்துவிட்டு” எரிபொருள் (fossil fuels) உற்பத்தி மற்றும் ஏற்றுமதித் துறையில் அல்பர்ட்டாவுடன் இணைந்து செயல்பட வேண்டும் என அவர் கியூபெக்கின் வர்த்தக சமூகத்திடம் வலியுறுத்தியுள்ளார்.
மொண்ட்ரீயலில் நடைபெற்ற வர்த்தகச் சமூகக் கூட்டமொன்றில் உரையாற்றிய போதே, டேனியல் ஸ்மித் இந்த கோரிக்கையை முன்வைத்துள்ளார்.
தற்போதைய உலகளாவிய புவிசார் அரசியல் சூழலைக் கருத்தில் கொண்டு, கியூபெக் மற்றும் ஆல்பர்ட்டா ஆகிய இரு மாகாணங்களும் இணைந்து, ஒரு வலுவான எரிசக்தித்துறைக்கான பங்காளர்களாக மாற வேண்டியதன் அவசியத்தை அவர் எடுத்துரைத்தார்.
கியூபெக் தனது சொந்த இயற்கை எரிவாயு (natural gas) தொழில்துறையை மேம்படுத்த வேண்டும் என்றும் ஸ்மித் கேட்டுக் கொண்டார்.
கியூபெக்கிடம் அடுத்த 200 ஆண்டுகளுக்குத் தேவையான இயற்கை எரிவாயு இருப்பு இருப்பதாக தான் நம்புவதாக அவர் கூறினார்.
கியூபெக் தனது சொந்த எரிசக்தி ஆதாரங்களை உருவாக்குவதன் மூலம், மத்திய அரசைச் சார்ந்திருப்பதைக் குறைத்து, மத்திய அரசின் நிதியைப் பெறும் நிலையையும் குறைக்க முடியும் என்றும் அவர் சுட்டிக்காட்டினார்.
ஆல்பர்ட்டாவின் ஆற்றலை, ஒன்டாரியோ மற்றும் கியூபெக்கின் உற்பத்தித் துறைக்கு (manufacturing base) வழங்குவதன் மூலம் கனடாவின் பொருளாதாரத்தை வலுப்படுத்த முடியும் என அவர் தெரிவித்தமை குறிப்பிடத்தக்கது.
