உலகப் புகழ்பெற்ற கிரௌன் றோயல் விஸ்கி வகையைத் தயாரிக்கும் டையாஜியோ (Diageo) நிறுவனம், ஒன்டாரியோ மாகாணத்தில் உள்ள அதன் தொழிற்சாலையை மூட இருப்பதாக அறிவித்துள்ளது.
குறித்த தொழிற்சாலை அடுத்த ஆண்டு பிப்ரவரி மாதம் மூடப்படுமெனத் தெரியவருகின்றது.
நிறுவனத்தின் இந்த திடீர் முடிவு, நாடு முழுவதும் உற்பத்தித் துறையில் வேலைவாய்ப்புகளின் எதிர்காலம் குறித்த அச்சத்தை ஏற்படுத்தியுள்ளது.
நாட்டின் மிகப்பெரிய தொழிற்சங்கங்களில் ஒன்றான யூனிஃபார் (Unifor), இந்த முடிவுக்கு எதிராகப் போராடப் போவதாக அறிவித்துள்ளது.
யூனிஃபார் லோக்கல் 200 அமைப்பின் தலைவர் ஜான் டி’அக்னோலோ, இந்த முடிவு “அதிர்ச்சியூட்டுவதாகவும், பேரழிவை ஏற்படுத்துவதாக அமைந்துள்ளதாகவும்” கூறினார்.
இந்த தொழிற்சாலை அம்ஹெர்ஸ்ட்பர்க் நகரின் அடையாளமாகவும், மிகப்பெரிய வேலைவாய்ப்பு வழங்குநராகவும் உள்ளது என்பதை அவர் சுட்டிக்காட்டியுள்ளார்.
இதேவேளை, கிரௌன் றொயல் விஸ்கி தொடர்ந்தும் கனடாவிலேயே தயாரிக்கப்பட்டு, வடித்து, பக்குவப்படுத்தப்படும் என்றும், ஆனால் கண்ணாடிக்குடுவைகளில் விஸ்கியை அடைக்கும் பணிகள் அமெரிக்காவுக்கு மாற்றப்படும் என்றும் நிறுவனம் விளக்கம் அளித்துள்ளது.
