சிஜேபி அமைப்பின் நிர்வாகிகள் கைது செய்யப்பட்ட சம்பவத்திற்கு மேற்கு வங்கத்தின் முன்னாள் முதல்வர் மம்தா பானர்ஜி தனது கடுமையான கண்டனங்களைப் பதிவு செய்துள்ளார்.
மேலும், நாட்டின் கோடிக்கணக்கான இளைஞர்களை நோக்கி, “சகோதரியாக எப்போதும் உங்களுடன் இருக்கிறேன்” என்று அவர் உறுதியளித்துள்ளார்.
டெல்லி ஜந்தர் மந்தரில் போராட்டம் நடத்துவதற்கு விதிக்கப்பட்ட தடையை மீறி உள்ளே நுழைந்ததாகக் கூறி, சிஜேபி அமைப்பைச் சேர்ந்த சௌரவ் தாஸ், அசுதோஷ் ரன்கா மற்றும் அஜிங்கியா ஆகியோரை டெல்லி காவல்துறையினர் கைது செய்தனர்.
பின்னர் நீதிமன்றத்தில் ஆஜர்படுத்தப்பட்ட அவர்கள் 5 நாள் காவலில் வைக்கப்பட்டுள்ளனர்.
இந்தக் கைது நடவடிக்கைக்குக் கண்டனம் தெரிவித்து மம்தா பானர்ஜி வெளியிட்டுள்ள சமூக வலைதளப் பதிவில், அசுதோஷ் ரன்கா மற்றும் சௌரவ் தாஸ் கைது செய்யப்பட்டுள்ளதை வன்மையாகக் கண்டிப்பதாகத் தெரிவித்துள்ளார்.
ஜனநாயகத்தைப் பாதுகாக்க அனைவரும் ஒன்றிணைந்து போராட வேண்டிய தருணம் இதுவென்றும், இது ஒட்டுமொத்த தலைமுறையையும் அச்சுறுத்தி அமைதிப்படுத்தும் முயற்சி என்றும் அவர் குறிப்பிட்டுள்ளார்.
நமது அரசியலமைப்பு உரிமைகளை எக்காலத்திலும் விட்டுக்கொடுக்கக் கூடாது எனவும் அவர் வலியுறுத்தியுள்ளார்.
நாட்டின் பல பகுதிகளில் இதுபோன்ற ஜனநாயகப் படுகொலைகள் தொடர்ந்து அரங்கேறி வருவதாகக் குறிப்பிட்ட அவர், மேற்கு வங்கத்தில் உள்ள 14,000 மக்கள் காவல்துறையினரின் அச்சுறுத்தல்களை எதிர்கொண்டு வருவதாகக் குற்றம்சாட்டினார்.
மக்களின் ஜனநாயகக் கோட்பாட்டை மறந்து செயல்படும் அரசு தனது இறுதிக்கட்டத்தை நெருங்கி வருவதாகவும் அவர் விமர்சித்துள்ளார்.
இறுதியாக, நாட்டின் இளம் தலைமுறையினருக்குத் தைரியம் ஊட்டும் வகையில், கோடிக்கணக்கான இளைஞர்களுக்குத் தமது சகோதரி என்ற முறையில் இன்றும், என்றும், எப்போதும் தாம் துணையாக இருப்பேன் என்றும், நாம் அனைவரும் ஒன்றுபட்டு நின்று நாட்டைப் பாதுகாப்போம் என்றும் மம்தா பானர்ஜி குறிப்பிட்டுள்ளார்.
