நவீன போர்க்களங்களில் ட்ரோன் (Drone) தொழில்நுட்பத்தின் பயன்பாடு அதிகரித்து வரும் நிலையில், கனடிய இராணுவ முகாம்களுக்கு ஏற்படக்கூடிய ட்ரோன் அச்சுறுத்தல்களைத் தடுப்பதற்கான அவசர நடவடிக்கைகளை கனடாவின் தேசிய பாதுகாப்புத் திணைக்களம் (DND) முன்னெடுத்துள்ளது.
கனடாவிலுள்ள இராணுவத் தளங்கள் மற்றும் முகாம்களின் பாதுகாப்பை உறுதி செய்யும் வகையில், அனுமதி பெறப்படாத ட்ரோன்களின் நடமாட்டத்தைக் கண்டறிந்து அவற்றை அழிக்கும் எதிர்ப்பு சாதனங்களைக் கொள்வனவு செய்ய பாதுகாப்புத் திணைக்களம் திட்டமிட்டுள்ளது.
ஐரோப்பாவில் அமைதி காக்கும் பணியில் ஈடுபட்டுள்ள கனடிய ஆயுதப்படை வீரர்களுக்கு வழங்கப்பட்டுள்ள பாதுகாப்பு ஏற்பாடுகளுக்கு அமைவாக, உள்நாட்டிலுள்ள இராணுவத் தளங்களுக்கும் இத்தகைய பாதுகாப்பை வழங்க நடவடிக்கைகள் எடுக்கப்பட்டு வருகின்றன.
இது குறித்து தேசிய பாதுகாப்புத் திணைக்களத்தின் பேச்சாளர் லோரா மெக்கின்டயர்-கிரில்ஸ் கருத்துத் தெரிவிக்கையில், நவீன பாதுகாப்பு மற்றும் திட்டமிடலில் ட்ரோன் எதிர்ப்புத் திறன்களைக் கொண்டிருப்பது மிகவும் முக்கியமானது எனக் குறிப்பிட்டார்.
அத்துடன், இராணுவ நடவடிக்கைகளின் பாதுகாப்பு மற்றும் தேசிய பாதுகாப்பு விதிவிலக்குகள் காரணமாக, கொள்வனவு செய்யப்படும் சாதனங்களின் நுணுக்கமான விபரங்களை பகிரங்கப்படுத்த முடியாது என்றும் அவர் தெரிவித்துள்ளார்.
உக்ரைன் போர்க்களத்தில் ட்ரோன்களின் தாக்கம் கணிசமாக அதிகரித்துள்ளதைத் தொடர்ந்தே கனடா இந்த முடிவை தீவிரப்படுத்தியுள்ளது.
2022 ஆம் ஆண்டில் இடம்பெற்ற மோதல்களில் ட்ரோன் தாக்குதல்களால் ஏற்பட்ட உயிரிழப்புகள் 10 சதவீதமாக இருந்த நிலையில், 2025 ஆம் ஆண்டளவில் அது 80 சதவீதமாக உயர்ந்துள்ளதாக சர்வதேச தரவுகள் தெரிவிக்கின்றன.
நேட்டோ அமைப்பின் கீழ் லாட்வியாவில் பணியமர்த்தப்பட்டுள்ள கனடியப் படைகள், உக்ரைனில் இடம்பெறும் ட்ரோன் தாக்குதல் உத்திகளை உன்னிப்பாக அவதானித்து வருகின்றன.
இதன் ஒரு பகுதியாக, மத்திய அரசாங்கம் தனது சொந்த ட்ரோன் மற்றும் ட்ரோன் எதிர்ப்புத் திறன்களை மேம்படுத்துவதற்காக ‘ட்ரோன் பாதுகாப்பு முன்னெடுப்பு’ (DDI) என்ற பன்முகத் திட்டத்தை நடப்பாண்டில் தொடங்கியுள்ளது.
இத்திட்டத்தின் மூலம் கனடிய ஆயுதப்படை மற்றும் கடலோரப் படைப்பிரிவுகளுக்குத் தேவையான நவீன ட்ரோன் தொழில்நுட்பங்களை ஆராய்ச்சி செய்வதற்கும், உற்பத்தியை விரைவுபடுத்துவதற்கும் மத்திய அரசு இலக்கு நிர்ணித்துள்ளது.
