கியூபெக் மாகாணச் சட்டசபைத் தேர்தல் முடிவுகள் வெளியானதைத் தொடர்ந்து, மாகாணத்தின் தேர்தல் முறையில் அவசியமான சீர்திருத்தங்களை மேற்கொள்ள வேண்டும் என்ற கோரிக்கைகளும் விவாதங்களும் மீண்டும் வலுப்பெற்றுள்ளன.
இத்தேர்தலில் ஆட்சியைக் கைப்பற்றியுள்ள ‘பார்ட்டி கியூபெகோவா’ (Parti Québécois – PQ) கட்சி, ‘கியூபெக் சொலிடேர்’ (Québec solidaire – QS) மற்றும் கன்சர்வேடிவ் ஆகிய கட்சிகள், தற்போதைய தேர்தல் முறைக்கு மாறாக ‘விகிதாசாரப் பிரதிநிதித்துவத் தேர்தல் முறையை’ (Proportional Representation) அறிமுகப்படுத்துவதாக கியூபெக் மக்களுக்கு வாக்குறுதி அளித்திருந்தன.
வாக்காளர்கள் அளிக்கும் வாக்குச் சதவீதத்திற்கு ஏற்பக் கட்சிகளுக்குச் சட்டசபையில் ஆசனங்கள் கிடைப்பதை உறுதி செய்வதே, ‘விகிதாசாரப் பிரதிநிதித்துவத் தேர்தல் முறையின் முக்கிய நோக்கமாகும்.
கியூபெக்கில் தற்போது அமுலில் உள்ள தேர்தல் முறையைச் சீரமைக்க வேண்டும் என்ற கோரிக்கை நீண்டகாலமாக வலியுறுத்தப்பட்டு வருகிறது.
கடந்த 2022ஆம் ஆண்டு நடைபெற்ற தேர்தலில், ‘கோலிஷன் அவெனிர் கியூபெக்’ (CAQ) கட்சி 41 சதவீத வாக்குகளை மட்டுமே பெற்றபோதிலும், சட்டசபையின் மொத்த ஆசனங்களில் 71 சதவீதத்தைக் கைப்பற்றி மாபெரும் பெரும்பான்மையுடன் ஆட்சியமைத்தது.
இது தற்போதைய தேர்தல் முறையின் பலவீனத்தைச் சுட்டிக்காட்டுவதாக அமைந்தது.
முன்னதாக 2018ஆம் ஆண்டுத் தேர்தலின் போது, அப்போதைய CAQ கட்சியின் தலைவரும் முன்னாள் கியூபெக் முதல்வருமான பிரான்சுவா லெகோ (François Legault), தேர்தல் முறையைச் சீரமைப்பதாக வாக்குறுதி அளித்திருந்தார்.
இருப்பினும், 2021ஆம் ஆண்டு கியூபெக் முதல்வர் பதவியில் இருந்தபோது அவர் தனது அந்த வாக்குறுதியைக் கைவிட்டிருந்தார்.
தற்போது நடைபெற்று முடிந்துள்ள தேர்தலில் பார்ட்டி கியூபெகோவா கட்சி மிகக் குறைந்த வாக்குச் சதவீதத்தைப் பெற்றே ஆட்சியைக் கைப்பற்றியுள்ள நிலையில், தேர்தல் முறைச் சீர்திருத்தத்திற்கான அழுத்தம் மேலும் அதிகரித்துள்ளது.
