கனடாவுக்கும் அமெரிக்காவுக்கும் இடையிலான வர்த்தகப் பதற்றம் தொடர்ந்து நீடித்து வரும் நிலையில், இரு நாடுகளுக்கும் இடையிலான வர்த்தக உடன்பாட்டை எட்டுவதற்கு தற்போது அவசரம் இல்லை என அமெரிக்க வர்த்தக பிரதிநிதி ஜேமிசன் கிரீர் தெரிவித்துள்ளார்.
கடந்த மாதம் இரு நாடுகளுக்கும் இடையிலான வர்த்தகப் பேச்சுவார்த்தைகள் முறிவடைந்ததைத் தொடர்ந்து, அமெரிக்கா பல கனேடிய பொருட்களுக்கு 50 சதவீத வரிகளை விதித்துள்ளது. இதற்கு பதிலடியாக கனடாவும் அமெரிக்கப் பொருட்களுக்கு புதிய வரிகளை அமுல்படுத்தியுள்ளது.
இந்நிலையில், கனடாவுடனான தற்போதைய வர்த்தக நிலைமையில் அமெரிக்க ஜனாதிபதி டொனால்ட் ட்ரம்ப் நிர்வாகம் திருப்தியாக இருப்பதாக ஜேமிசன் கிரீர் தெரிவித்துள்ளார். கனடாவிடமிருந்து எண்ணெய், எரிவாயு, பொட்டாஷ் உள்ளிட்ட முக்கிய பொருட்கள் தொடர்ந்து அமெரிக்காவுக்கு கிடைத்து வருவதாகவும் அவர் குறிப்பிட்டுள்ளார்.
மேலும், கனேடிய மதுபானங்கள், சில பால் உற்பத்திப் பொருட்கள் மற்றும் மோட்டார் சைக்கிள்கள் உள்ளிட்ட பல பொருட்களுக்கு அமெரிக்க சந்தையில் இறக்குமதி கட்டுப்பாடுகள் எதிர்வரும் செப்டம்பர் 29ஆம் திகதி முதல் அமுலுக்கு வரவுள்ளன.
இதனிடையே, கனேடிய வாகனங்கள், வாகன உதிரிப்பாகங்கள் மற்றும் எஃகு உள்ளிட்ட துறைகளுக்கு எதிர்காலத்தில் 50 சதவீத வரிகள் விதிக்கப்படக்கூடும் என அமெரிக்க தரப்பு எச்சரித்துள்ளது.
இந்த வர்த்தக மோதல் நீடிப்பதால், இரு நாடுகளுக்கும் இடையிலான நீண்டகால வர்த்தக உறவு மற்றும் அமெரிக்கா, கனடா, மெக்சிகோ இடையிலான USMCA வர்த்தக உடன்படிக்கையின் எதிர்காலம் குறித்தும் கேள்விகள் எழுந்துள்ளன.
எனினும், இரு நாடுகளுக்கும் இடையிலான வர்த்தகம் தொடர்ந்து இடம்பெற்று வருவதாகவும், எதிர்காலத்தில் சாத்தியமான உடன்பாடுகள் தொடர்பாக இரு தரப்பினரும் அவ்வப்போது கலந்துரையாடி வருவதாகவும் அமெரிக்க வர்த்தக பிரதிநிதி தெரிவித்துள்ளார்.
