அமெரிக்க அதிபர் டொனால்ட் டிரம்ப் நிர்வாகத்தினால் கனடா மீது மேற்கொள்ளச் சாத்தியமான ராணுவ நடவடிக்கை அல்லது ஊடுருவல்கள் குறித்து தாம் ஆராய்ந்ததாக, பிரதமர் மார்க் கார்னி (Mark Carney) தெரிவித்துள்ளார்.
இத்தகைய ஒரு சூழல் ஏற்படுவதற்கான வாய்ப்பு மிக மிகக் குறைவு (“extreme tail risk”) என்ற போதிலும், நாட்டின் தலைவராக அதனை ஆராயாமல் இருப்பது பொறுப்பற்ற செயலாகும் என, அவர் சுட்டிக்காட்டியுள்ளார்.
‘நியூயார்க் டைம்ஸ்’ (New York Times) நாளிதழுக்கு அளித்த விசேட செவ்வியிலேயே பிரதமர் கார்னி இந்த அதிர்ச்சித் தகவலை வெளிப்படுத்தியுள்ளார்.
கனடாவை அமெரிக்காவின் 51 ஆவது மாநிலமாக மாற்றுவது குறித்து அதிபர் டிரம்ப் தொடர்ச்சியாகப் பேசி வரும் பின்னணியில், பிரதமர் மார்க் கார்னி வெளியிட்டுள்ள இக்கருத்துக்கள் சர்வதேச மற்றும் கனடிய அரசியல் வட்டாரத்தில் பெரும் பரபரப்பை ஏற்படுத்தியுள்ளன.
இதேவேளை, அமெரிக்காவின் இந்தோ-பசிபிக் பிராந்தியக் கட்டளையகத்தின் தளபதி அட்மிரல் சாமுவேல் பாப்பாரோ (Samuel Paparo), கனடா மீதான அமெரிக்க ஊடுருவல் என்ற கருத்தை “முற்றிலும் ஆதாரமற்ற மற்றும் விசித்திரமான கற்பனை” எனக் கூறி நிராகரித்துள்ளார்.
”அமெரிக்காவின் ஊடுருவல் போன்றவொரு கற்பனைக்கு அப்பாற்பட்ட விடயத்தை பிரதமர் ஆராய வேண்டிய நிலைக்குத் தள்ளப்பட்டிருப்பது, இரு நாடுகளுக்கும் இடையிலான வரலாற்றுச் சிறப்புமிக்க உறவு முற்றிலும் தலைகீழாக மாறியுள்ளதை உணர்த்துகிறது” என புதிய ஜனநாயகக் கட்சியின் (NDP) நாடாளுமன்றத் தலைவர் டான் டேவிஸ் சுட்டிக்காட்டியுள்ளார்.
அதேவேளையில், நாட்டின் பாதுகாப்பை உறுதிப்படுத்தும் பொருட்டு சாத்தியக்கூறுகள் குறைந்த ஆபத்துக்களைக் கூட, ஒரு பொறுப்புள்ள தலைவர் கணக்கிட்டு வைப்பது அவசியமானது எனப் பாதுகாப்புத் துறை வல்லுநர்கள் தெரிவித்துள்ளனர்.
