மொண்ட்ரியல் நகரில் படுகொலை செய்யப்பட்ட கனடிய வருவாய்த்துறை (CRA) பெண் அதிகாரியான லைலா பென் சேலம் (Leïla Ben Salem) என்பவரின் மறைவுக்கு, பிரதமர் மார்க் கார்னி (Mark Carney) மற்றும் எதிர்க்கட்சித் தலைவர் பியர் பொய்லியேவ் (Pierre Poilievre) ஆகியோர் தங்களது ஆழ்ந்த இரங்கலைப் பதிவுசெய்துள்ளனர்.
நாடாளுமன்றத்தின் பொதுச்சபையில் இந்த இரங்கல் பதிவுகள் முன்வைக்கப்பட்டுள்ளன.
கடந்த செவ்வாய்க்கிழமை மொண்ட்ரியலின் வில்லே-மேரி (Ville-Marie) பகுதியில் அமைந்துள்ள அவரது வீட்டில், நலன்புரிப் பரிசோதனைக்காகச் (Welfare check) சென்ற பொலிஸாரால் லைலா பென் சேலம் சடலமாக மீட்கப்பட்டார்.
தாக்குதல் நடந்த போது அவர் தனது உத்தியோகபூர்வக் கடமையில் ஈடுபட்டிருந்ததாக, அரசுத் தகவல்கள் தெரிவிக்கின்றன.
பென் சேலம் கனடிய வருவாய்த்துறையின் மதிப்பிற்குரிய ஊழியர் எனவும் கனடிய மக்களுக்குச் சேவை செய்வதில் மிகுந்த அர்ப்பணிப்புடன் செயற்பட்ட அவர், தாக்குதலுக்கு உள்ளான தருணத்திலும் அந்தச் சேவையையே ஆற்றிக் கொண்டிருந்தார் எனவும் பிரதமர் கார்னி தமது உரையில் குறிப்பிட்டுள்ளார்.
தொடர்ந்து உரையாற்றிய பிரதான எதிர்க்கட்சித் தலைவரான பியர் பொய்லியேவ்ரு (Pierre Poilievre), “சேவை செய்து தனது உயிரை இழந்துள்ள பொதுச் சேவைத் துறையின் ஒரு பொக்கிஷமான உறுப்பினரை நாடு இழந்துவிட்டது” எனக் கூறி, அஞ்சலி செலுத்தியமை குறிப்பிடத்தக்கது.
