மொன்றியல்-ட்ரூடோ சர்வதேச விமான நிலைய (Montreal-Trudeau International Airport) வருகைப் பகுதியில் வாகனக் கட்டுப்பாட்டுப் பணியில் ஈடுபட்டிருந்த பாதுகாப்பு அதிகாரி ஒருவர் வாகனம் மோதியதில் படுகாயமடைந்து மருத்துவமனையில் அனுமதிக்கப்பட்டுள்ளார்.
இச்சம்பவத்தைத் தொடர்ந்து குறித்த பகுதியில் தீவிர விசாரணை மேற்கொள்ளப்பட்டதால் விமான நிலையத்தை சுற்றியுள்ள பாதைகளில் பெரும் போக்குவரத்து நெரிசல் ஏற்பட்டது.
விமான நிலையத்தின் வருகைப் பகுதிக்கு (Arrivals section) செல்லும் பாதையில் வாகன நெரிசலைக் சீரமைத்துக் கொண்டிருந்தபோது, எதிர்பாராதவிதமாக வந்த வாகனம் ஒன்று பாதுகாப்பு அதிகாரி மீது மோதியது.
தற்போது மருத்துவமனையில் அனுமதிக்கப்பட்டுள்ள அவருக்குப் பலத்த காயங்கள் ஏற்பட்டுள்ள போதிலும், ஆபத்தான கட்டத்தைத் தாண்டிவிட்டதாகக் காவல் துறை தரப்பில் தெரிவிக்கப்பட்டுள்ளது.
விபத்தை ஏற்படுத்திய வாகனத்தின் சாரதி சம்பவ இடத்திலேயே தங்கியிருந்து, பொலிஸாரின் விசாரணைக்கு முழு ஒத்துழைப்பு வழங்கியுள்ளார்.
சாரதி மீது சட்ட நடவடிக்கை அல்லது வழக்குப்பதிவு செய்வதற்கான சாத்தியக்கூறுகள் குறித்து ஆராயப்பட்டு வருகிறது.
