மொன்றியல் நகரில் அமைந்துள்ள ட்ரூடோ சர்வதேச விமான நிலையத்திற்கு (Montréal-Trudeau International Airport) வெளியே, டாக்சி சாரதிகள் வேலைநிறுத்தப் போராட்டத்தில் ஈடுபடவுள்ளதாக அறிவித்துள்ளனர்.
விமான நிலையத்தில் பணியாற்றுவதற்கான அனுமதிச் சீட்டுச் செலவுகள் உயர்ந்துள்ளமை மற்றும் தங்களின் தொழில் ரீதியான கோரிக்கைகளுக்கு
நிர்வாகம் உரிய தீர்வு வழங்கத் தவறியமையைக் கண்டித்தே இந்த அதிரடிப் போராட்டத்திற்கு அழைப்பு விடுக்கப்பட்டுள்ளது.
விமான நிலையத்தில் இருந்து பயணிகளை ஏற்றிச் செல்வதற்கு டாக்சி சாரதிகள் மாதாந்தம் $2,500 டொலர் வரை கட்டணமாகச் செலுத்த வேண்டியுள்ளதாகப் போராட்டத்தில் ஈடுபடும் ஓட்டுநர்கள் தெரிவித்துள்ளனர். குறிப்பாக, சாரதிகளின் வருமானம் குறைந்து வரும் சூழலில், விமான நிலைய நிர்வாகத்தின் இத்தகைய அதிகப்படியான அனுமதிச் சான்றிதழ்க் கட்டணம் (Permit Fees) மற்றும் கடுமையான கட்டுப்பாடுகள் தங்களது வாழ்வாதாரத்தைப் பெரிதும் பாதித்துள்ளதாக அவர்கள் சுட்டிக்காட்டியுள்ளனர்.
இது தொடர்பில் நிர்வாகத்துடன் பலமுறை பேச்சுவார்த்தை நடத்தியும் திருப்திகரமான தீர்வு கிடைக்காததால், பணிப்புறக்கணிப்பு செய்ய முடிவெடுக்கப்பட்டதாக டாக்சி சாரதிகள் சங்கப் பிரதிநிதிகள் தெரிவித்தனர். வார இறுதிப் பயணங்களை மேற்கொள்ளும் ஆயிரக்கணக்கான உள்நாட்டு மற்றும் சர்வதேசப் பயணிகள் இதனால் பெரும் சிரமங்களை எதிர்கொள்ள நேரிடும் எனக் கருதப்படுகிறது.
மொன்றியல் ட்ரூடோ விமான நிலையத்தின் முக்கிய வருகை மற்றும் புறப்பாடு முனையப் பகுதிகளில் டாக்சி சேவைகள் முழுமையாக ஸ்தம்பிக்கும் அபாயம் ஏற்பட்டுள்ளதால், விமான நிலையத்திற்குச் செல்லும் பயணிகள் தங்களது பயணத் திட்டங்களை முன்கூட்டியே திட்டமிடுமாறு கேட்டுக்கொள்ளப்பட்டுள்ளனர்.
