உக்ரைன் மீதான ரஷியாவின் தாக்குதல் உத்திகளைத் துல்லியமாகக் கற்றுக்கொண்டு, அமெரிக்காவின் அதிநவீன வான் பாதுகாப்பு அமைப்புகளை ஈரானிய ராணுவம் வெற்றிகரமாக முறியடித்துள்ளமை சர்வதேச அளவில் பெரும் பரபரப்பை ஏற்படுத்தியுள்ளது.
சமீபத்தில் ஜோர்டானில் அமைந்துள்ள அமெரிக்க ராணுவத் தளத்தின் மீது ஈரான் நடத்திய டிரோன் மற்றும் ஏவுகணைத் தாக்குதலில் மூன்று அமெரிக்க வீரர்கள் உயிரிழந்ததுடன் பலர் படுகாயமடைந்தனர். உலகிலேயே மிக சக்திவாய்ந்ததாகக் கருதப்படும் அமெரிக்காவின் ‘பேட்ரியாட்’ (Patriot) இடைமறிப்பு ஏவுகணை அமைப்புகளைத் தாண்டி இந்த இழப்பு ஏற்பட்டுள்ளமை பாதுகாப்பு வல்லுநர்களை வியப்பில் ஆழ்த்தியுள்ளது.
கடந்த நான்கு ஆண்டுகளாக நடைபெற்று வரும் உக்ரைன் போரில், அமெரிக்கா வழங்கிய வான் பாதுகாப்பு அமைப்புகளைச் செயலிழக்கச் செய்ய ரஷியா ஒரே நேரத்தில் பல்வேறு வகையான ஏவுகணைகளையும் டிரோன்களையும் திரளாக அனுப்பும் தந்திரத்தைக் கையாண்டது. இதே முறையை பயன்படுத்தி ஈரான், அமெரிக்க ராணுவத் தளத்தை நோக்கி ஒரே நேரத்தில் டிரோன்களையும் ஏவுகணைகளையும் ஏவி வான் பாதுகாப்பு அமைப்பிற்கு அதீத அழுத்தத்தைக் கொடுத்து திணறடித்துள்ளது. இதனால் சில தாக்குதல்களை இடைமறிக்க முடியாமல் அமெரிக்க அமைப்புகள் தவறியதே இந்த பெரும் சேதத்திற்குக் காரணமாக அமைந்துள்ளது.
மேலும், அமெரிக்கா மற்றும் இஸ்ரேலின் தாக்குதல்களில் இருந்து தங்களைப் பாதுகாத்துக் கொள்ள ஈரான் தனது முக்கிய ராணுவக் கட்டமைப்புகள், ஏவுகணைத் தளங்கள் மற்றும் அணுசக்தித் திட்டங்களை மலைகளுக்கு அடியில் 300 அடிக்கும் அதிகமான ஆழத்தில் நிலத்தடிப் புகலிடங்களாக அமைத்துள்ளது. தாக்குதலுக்குப் பிறகு தனது ராணுவச் சொத்துக்களை மிக விரைவாகச் சீரமைக்கும் ஆற்றலையும், மூத்த தலைவர்களைப் பாதுகாப்பான மறைவிடங்களுக்கு மாற்றும் நுட்பத்தையும் ஈரான் சிறப்பாகச் செயல்படுத்தி வருகிறது.
ரஷியாவின் இந்த உத்திகளை ஈரான் திறம்படப் பயன்படுத்தி வருவதால், மத்திய கிழக்கு பிராந்தியத்தில் அமெரிக்காவிற்கு எதிரான மோதல் மேலும் தீவிரமடைவதோடு, அமெரிக்க வான் பாதுகாப்புப் படைகளுக்கும் இது மிகப்பெரிய சவாலாக உருவெடுத்துள்ளது.
