கியூபெக் மாகாணத்திலுள்ள ஷெர்புரூக் (Sherbrooke) மாநகரசபையானது, பாரிய தகவல் மையம் ஒன்றை அமைப்பதற்காக, நிலம் விற்பனை செய்ய ஒப்புதல் அளித்துள்ளமைக்கு, எதிர்ப்புத் தெரிவிக்கப்பட்டுள்ளது.
அமெரிக்க நிறுவனமான ‘கீல் இன்ஃப்ராஸ்ட்ரக்சர்’ (Keel Infrastructure) நிறுவனத்திற்கே அந்த நிலத்தினை விற்பனை செய்வதற்கு ஷெர்புரூக்
(Sherbrooke) மாநகரசபை முதற்கட்ட ஒப்புதலை அளித்திருந்தது. இதற்கு எதிராக 4,500 க்கும் மேற்பட்ட உள்ளூர்மக்கள் கையெழுத்திட்டுப்
மனுவொன்றைச் சமர்ப்பித்துள்ளனர்.
நகரப் பூங்காவிற்கு அருகிலுள்ள தொழில்பேட்டைப் பகுதியில் (Industriel Boulevard) அமைக்கத் திட்டமிடப்பட்டுள்ள இந்த பாரிய தகவல்
மையத்தால், ஒலி மாசுபாடு, சுற்றாடல் பாதிப்பு மற்றும் குடிநீர் விநியோகத்தில் சிக்கல்கள் ஏற்படுமென அச்சம் தெரிவிக்கப்பட்டுள்ளது.
ஷெர்புரூக் (Sherbrooke) மாநகரசபையானது தங்களை கலந்தாலோசிக்காமல், இந்த விடயத்தில் ரகசியமாக முடிவெடுத்துள்ளதாக, மக்கள் குற்றம்சாட்டியுள்ளனர்.
பொதுமக்கள் கலந்துரையாடல் எதனையும் நடத்தாமல், மூடிய கதவுகளுக்குப் பின்னால் இத் திட்டத்திற்கான நில விற்பனை ஒப்பந்தத்தை
ஷெர்புரூக் மாநகரசபை முன்னெடுத்துள்ளதாக மக்கள் வேதனை தெரிவித்துள்ளனர்.
இப் போராட்டத்தை முன்னெடுத்து வரும் உள்ளூர்வாசியான ஜெய்சன் ரோய் (Jayson Roy) தெரிவிக்கையில், ஷெர்புரூக் (Sherbrooke) மாநகரசபை நிர்வாகம் இத் திட்டத்தின் நிதிச் சாதகங்களை மட்டுமே முன்னிலைப்படுத்திவிட்டு, அதனால் ஏற்படப்போகும் சுற்றாடல்
பாதிப்புகளைப் புறந்தள்ளி வருவதாகத் தெரிவித்தார்.
திட்டத்தைத் தொடர்வதற்கு முன்னர் விரிவான சுற்றாடல் மதிப்பீட்டு ஆய்வுகள் நடத்தப்பட வேண்டும் என்றும், பொது விவாதம் அமைக்கப்பட
வேண்டும் என்றும் உள்ளூர்மக்கள் அளித்த மனுவில் கோரப்பட்டுள்ளது.
