ஒன்டாரியோவில் கார் காப்புறுதி தொடர்பான புதிய விதிமுறைகள் எதிர்வரும் ஜூலை முதலாம் திகதி முதல் அமலுக்கு வரவுள்ளன.
புதிய நடைமுறையின் கீழ், விபத்து காப்புறுதியின் கீழ் இதுவரை கட்டாயமாக வழங்கப்பட்ட சில பாதுகாப்புகள் இனி விருப்பத் தேர்வாக மாற்றப்படுகின்றன.
இதனால் வாகன ஓட்டிகள் தங்களுக்குத் தேவையான காப்புறுதி பாதுகாப்புகளைத் தேர்ந்தெடுத்து, ஆண்டுக்கு சுமார் 100 முதல் 200 கனேடிய டொலர் வரை காப்புறுதி கட்டணத்தைச் சேமிக்க முடியும் என காப்புறுதி தரகர்கள் தெரிவிக்கின்றனர்.
எனினும், குறைந்த கட்டணத்திற்காக இறுதிச் சடங்கு செலவு, வருமான இழப்பு, பராமரிப்பாளர் உதவி உள்ளிட்ட முக்கிய பாதுகாப்புகளை நீக்குவது, எதிர்காலத்தில் விபத்து ஏற்பட்டால் அதிக நிதிச் சுமையை ஏற்படுத்தக்கூடும் என நிபுணர்கள் எச்சரித்துள்ளனர்.
கனடாவிலேயே அதிக கார் காப்புறுதி கட்டணம் வசூலிக்கப்படும் மாகாணமாக ஒன்டாரியோ அடையாளம் காணப்பட்டதைத் தொடர்ந்து, வாகன ஓட்டிகளுக்கு அதிக தேர்வு வாய்ப்புகளை வழங்கும் நோக்கில் இந்த மாற்றம் அறிமுகப்படுத்தப்பட்டுள்ளதாக தெரிவிக்கப்பட்டுள்ளது
