கியூபெக் (Quebec) மாகாணத்தின் கிழக்கு பிராந்தியங்களில் தொலைபேசி சேவைகளுக்கான தேவை முன்னெப்போதும் இல்லாத வகையில் நாளுக்கு நாள் அதிகரித்து வருவதை அடுத்து, அங்கு புதிய பிராந்தியக் குறியீடாக (Area Code) ‘273’ அறிமுகம் செய்யப்படவுள்ளது.
கனடிய வானொலி, தொலைக்காட்சி மற்றும் தொலைத்தொடர்பு ஆணையத்தின் (CRTC) வழிகாட்டுதலின்படி, எதிர்வரும் 2027 ஆம் ஆண்டு பிப்ரவரி 27 ஆம் திகதி முதல் இந்த புதிய தொலைபேசிக் குறியீட்டு நடைமுறை அமலுக்கு வரும் என்று அறிவிக்கப்பட்டுள்ளது.
‘பெல் கனடா’ (Bell Canada) நிறுவனம் மற்றும் கனடிய எண்களுக்கான நிர்வாக அமைப்பு (CNA) முதலானவை இந்த அறிவித்தலை அதிகாரப்பூர்வமாக வெளியிட்டுள்ளன.
தற்போது கியூபெக் மாகாணத்தின் கிழக்கு பகுதிகளில் பயன்பாட்டில் உள்ளவையான 418, 581 மற்றும் 367 ஆகிய மூன்று பிராந்தியக் குறியீடுகளின் கீழ் உள்ள தொலைபேசி எண்கள் அனைத்தும் இன்னும் சில மாதங்களில் முழுமையாகத் தீர்ந்துபோகும் (Exhaust) நிலையை எட்டவுள்ளன.
இந்த அலைவரிசை நெருக்கடியைத் தவிர்த்து, பொதுமக்களுக்கும் வணிக நிறுவனங்களுக்கும் தங்குதடையின்றி புதிய தொலைபேசி இணைப்புகளை வழங்குவதற்காகவே, நான்காவது பிராந்தியக் குறியீடாக ‘273’ கொண்டுவரப்படுகிறது.
2027 ஆம் ஆண்டு பிப்ரவரி 27 ஆம் திகதி முதல் புதிய இணைப்பு கோருபவர்களுக்கு இந்த ‘273’ என்ற எண்களைக் கொண்ட புதிய தொலைபேசி எண்கள் படிப்படியாக ஒதுக்கப்படும் எனத் தெரிவிக்கப்பட்டுள்ளது.
