கியூபெக் மாகாண பாடசாலையொன்றில் சிறுவர்கள் லாக்கர்களில் (Lockers) அடைக்கப்பட்டதாகக் கூறப்படும் சம்பவம் தொடர்பில், தமக்கு இதுவரை எவ்வித முறைப்பாடுகளும் கிடைக்கவில்லை என தேசிய மாணவர் குறைகேள் ஆணையம் (PNE) தெரிவித்துள்ளது.
பெற்றோர்கள் அல்லது மாணவர்களிடமிருந்து உத்தியோகபூர்வ முறைப்பாடு கிடைக்கும் வரை, இவ்விவகாரம் குறித்து விசாரணையை ஆரம்பிக்கவோ அல்லது பரிந்துரைகளை வழங்கவோ தம்மால் முடியாது என அந்த ஆணையம் இன்று அறிவித்துள்ளது.
கியூபெக் பாடசாலைகளில் சிறுவர்களின் உரிமைகள் மதிக்கப்படுவதை உறுதிசெய்யும் உத்தியோகபூர்வ அமைப்பான தேசிய மாணவர் குறைகேள் ஆணையத்தின் பேச்சாளர் நிக்கோல் ஸ்டிபானிசிக் (Nicole Stipaničić) இது குறித்துத் தெரிவிக்கையில், ஊடகச் செய்திகள் மூலமாகவே தாம் இத்தகவலை அறிந்துகொண்டதாகக் குறிப்பிட்டார்.
“மாணவர் குறைகேள் ஆணையச் சட்டத்தின் கீழ், மாணவர்களுக்கு எதிரான பாலியல் வன்முறைச் சம்பவங்களில் மாத்திரமே, பிராந்திய மாணவர் குறைகேள் அதிகாரிகள் (RSOs) தாமாக முன்வந்து விசாரணையை ஆரம்பிக்கவோ அல்லது மூன்றாம் தரப்பினரின் தகவல்களை ஆராயவோ முடியும்.
இச்சம்பவம் அல்லது இது போன்ற ஏனைய சம்பவங்கள் குறித்து பெற்றோர் அல்லது மாணவரிடமிருந்து முறைப்பாடு கிடைத்தால் மட்டுமே, சட்டத்தால் நிறுவப்பட்ட நடைமுறைகளுக்கு அமைய அதனைக் கையாள முடியும்” என நிக்கோல் ஸ்டிபானிசிக் மேலும் தெரிவித்தார்.
கியூபெக் மாகாணத்தின் பிளெய்ன்வில் நகரத்தில் அமைந்துள்ள பாடசாலையில் ஐந்து, ஆறு மற்றும் ஏழு வயதுடைய குறைந்தது மூன்று மாணவர்கள் லாக்கர்களில் அடைத்து வைக்கப்பட்டதாகவும், அவற்றில் சில பூட்டப்பட்டிருந்ததாகவும் கடந்த வாரம் தகவல்கள் வெளியாகி இருந்தன.
இந்த விவகாரம் சர்ச்சையாக உருவெடுத்ததை அடுத்து, பொலிஸாரும் இளைஞர் பாதுகாப்புப் பிரிவும் (DPJ) விசாரணைகளை முன்னெடுக்கவுள்ளதாக அறிவித்துள்ளன.
அதேபோல், கியூபெக் கல்வி அமைச்சர் ஜோயல் ஆர்செனோ (Joël Arseneau) அமைச்சு மட்டத்திலான விசாரணைக்கு உத்தரவிட்டுள்ளார். இந்த நிலையிலேயே, தேசிய மாணவர் குறைகேள் ஆணையம் இக்கருத்தை வெளிப்படுத்தியுள்ளது.
