கியூபெக் தேசிய சபையில் (National Assembly) நுழைவதற்குத் தயாராகி வரும் நிலையில், தன்னை “மேலும் தொழில்முறைப்படுத்தும்” நோக்கில் மூன்று முக்கிய நியமனங்களை கியூபெக் கன்சர்வேட்டிவ் கட்சி (PCQ) அறிவித்துள்ளது.
லெவிஸ் (Lévis) நகரின் முன்னாள் மேயர் கில்ஸ் லெஹுல்லியர் (Gilles Lehouillier), முன்னாள் ஊடகவியலாளர் மெலிசா பிரான்சுவா (Mélissa François) மற்றும் மரியோ டுமோண்டின் முன்னாள் தலைமை அதிகாரி அலைன் சான்ஸ் கார்டியர் (Alain Sans Cartier) ஆகியோர் பல்வேறு பொறுப்புகளில் தமது அணியில் இணைந்துள்ளதாகக் கியூபெக் கன்சர்வேட்டிவ் கட்சித் தலைவர் எரிக் டுஹெய்ம் (Éric Duhaime) இன்று தெரிவித்துள்ளார்.
2013 முதல் 2025 வரை லெவிஸ் நகரின் மேயராகப் பணியாற்றிய கில்ஸ் லெஹுல்லியர், கட்சியின் கொறடா (Whip) அலுவலகத்தின் விசேட ஆலோசகராக நியமிக்கப்பட்டுள்ளார். “குழு உணர்வை வலுப்படுத்தவும்” கட்சியின் ஒற்றுமையைப் பேணவும் அவர் உதவுவார் என டுஹெய்ம் குறிப்பிட்டுள்ளார்.
தேர்தல் பிரசாரத்தின் போது பெர்த்தியர்-சுர்-மெர் (Berthier-sur-Mer) பகுதியில் டுஹெய்முடன் இணைந்து ஊடகவியலாளர் சந்திப்பில் தோன்றிய லெஹுல்லியர், மூன்றாவது இணைப்புத் திட்டத்தை (Third link project) தேசிய சபைக்குக் கொண்டு செல்ல மிகவும் பொருத்தமான கட்சி கன்சர்வேட்டிவ் கட்சி எனக் கூறியிருந்தார்.
அடுத்த தேர்தலுக்கான வேட்பாளர்களைத் தெரிவு செய்யும் பொறுப்பு அலைன் சான்ஸ் கார்டியரிடம் ஒப்படைக்கப்பட்டுள்ளது. ‘ஆக்ஷன் டெமாக்ரடிக் டு கியூபெக்’ (Action démocratique du Québec) கட்சியின் காலத்தில் மரியோ டுமோண்டின் தலைமை அதிகாரியாகப் பணியாற்றிய அவர், அண்மையில் சர்வதேச உறவுகள் மற்றும் பிராங்கோபோனி அமைச்சு மற்றும் கல்வி அமைச்சு ஆகியவற்றில் பிரதி அமைச்சராகவும், அதற்கு முன்னர் நிறைவேற்று சபை அமைச்சின் இணைப் பொதுச் செயலாளராகவும் கடமையாற்றியுள்ளார்.
இதேவேளை, மெலிசா பிரான்சுவா கட்சித் தலைவர் எரிக் டுஹெய்மின் ஊடகச் செயலாளராக நியமிக்கப்பட்டுள்ளார். ரேடியோ-கனடா (Radio-Canada) மற்றும் சி.பி.சி (CBC) ஆகியவற்றில் பத்து ஆண்டுகளுக்கும் மேலாகப் பணியாற்றிய அனுபவமும், அதற்கு முன்னர் டி.வி.ஏ (TVA) நிறுவனத்தில் இரண்டு ஆண்டுகள் பணியாற்றிய அனுபவமும் கொண்டவராக அவர் முன்னிறுத்தப்பட்டுள்ளார்.
இந்த “மிகவும் திறமையான மூன்று நபர்களும்” கட்சியின் அடித்தளத்தை விரிவுபடுத்த உதவுவார்கள் என எரிக் டுஹெய்ம் சமூக வலைத்தளத்தில் பதிவிட்டுள்ளார். எதிர்வரும் டிசம்பர் முதலாம் திகதி கியூபெக் தேசிய சபையின் அமர்வுகள் மீண்டும் ஆரம்பமாகும் போது, 19 உறுப்பினர்களைக் கொண்ட கியூபெக் கன்சர்வேட்டிவ் கட்சி சபையின் இரண்டாவது பெரிய எதிர்க்கட்சியாகச் செயற்படவுள்ளமை குறிப்பிடத்தக்கது.
