ஸ்வீடனின் புகழ்பெற்ற சாப் (Saab) பாதுகாப்புத் தொழில்நுட்ப நிறுவனத்திடமிருந்து குளோபல்ஐ (Global Eye) ரக ரேடார் விமானங்களைக் கொள்வனவு செய்வதற்கான உத்தியோகபூர்வ பேச்சுவார்த்தைகளை கனேடிய அரசு ஆரம்பித்துள்ளது. நாட்டின் வான் பாதுகாப்பு மற்றும் ஆர்க்டிக் பிராந்தியக் கண்காணிப்பை பலப்படுத்தும் நோக்கிலேயே, அதிநவீன வான்வழி முன்கூட்டிய எச்சரிக்கை வசதி கொண்டுள்ள குளோபல்ஐ (Global Eye) ரக விமானங்கள் கொள்வனவு செய்யப்படவுள்ளன.
கனேடிய ஆயுதப் படைகளுக்கான இந்த வரலாற்று முக்கியத்துவம் வாய்ந்த புதிய பாதுகாப்புத் திட்டத்தை, பிரதமர் மார்க் கார்னி (Mark Carney) அதிகாரப்பூர்வமாக அறிவித்துள்ளார். ஒட்டாவாவில் நடைபெற்ற கனேடிய நிறுவனங்களின் பாதுகாப்பு மற்றும் தற்பாதுகாப்புத் துறை தலைவர்களின் மாநாட்டில், ஸ்வீடன் நிறுவனத்தைத் தேர்ந்தெடுத்துள்ள மத்திய அரசின் இந்த முடிவு உத்தியோகபூர்வமாக வெளியிடப்பட்டது.
கனடாவின் மொன்றியல் பிராந்தியத்தை தளமாகக் கொண்டு இயங்கும் பொம்பார்டியர் (Bombardier) நிறுவனத்தின் குளோபல் 6500 ரக அதிநவீன வணிக ஜெட் விமானங்களில், ஸ்வீடனின் சாப் நிறுவனம் தயாரிக்கும் அதிநவீன வான்வழி ரேடார் சென்சார் அமைப்புகள் பொருத்தப்படவுள்ளமை, இந்த பாதுகாப்பு ஒப்பந்தத்தின் மிக முக்கிய அம்சம் எனத் தெரிவிக்கப்பட்டுள்ளது.
