அமெரிக்காவில் தயாரிக்கப்பட்ட F-35 போர் விமானம், அதன் ஸ்வீடன் போட்டியாளரான கிரிப்பன்-இ (Gripen-E) விமானத்தை விட இராணுவ மற்றும் தொழில்நுட்பத் திறன்களில் மிகப் பெரிய அளவில் மேலானது என்று இரகசியத் தரவுகள் தற்போது வெளியாகியுள்ளன.
கனடா தேசியப் பாதுகாப்புத் துறை (DND) 2021-இல் நடத்திய மதிப்பீட்டில், இந்த விடயம் கண்டறியப்பட்டுள்ளது.ஊடகமொன்றுக்கு
கிடைத்த இந்தத் தரவுகள், கனடா அரசாங்கம் ஏன் F-35 விமானத்தை வாங்குவதற்கு முடிவெடுத்தது என்பதைத் தெளிவாக
விளக்குகின்றன.
அந்த மதிப்பீட்டில், இராணுவத் திறன்கள் பிரிவில் F-35, 60 புள்ளிகளுக்கு 57.1 புள்ளிகள் பெற்றுத் தனித்து முன்னிலை வகித்துள்ளது.
இதற்கு மாறாக, கிரிப்பன்-இ விமானம் அந்த மதிப்பீட்டில், வெறும் 19.8 புள்ளிகள் மட்டுமே பெற்றிருந்தது. வட அமெரிக்காவைப் பாதுகாப்பதற்கான தயார்நிலை, மற்றும் நவீனப் படைகளுக்கு எதிரான பல்வேறு பணிகளில் வெற்றி பெறுவதற்கான சாத்தியக்கூறுகள், ஆகியவற்றை மையமாகக் கொண்டே இந்த மதிப்பீடு நடைபெற்றது.
அதிகாரப்பூர்வ இராணுவ மதிப்பீடுகள் F-35-க்குச் சாதகமாக இருந்தாலும், கனடா அரசாங்கம் தற்போது கொள்முதல் ஒப்பந்தத்தை மறுபரிசீலனை செய்து வருகிறது.
தொழில்துறை அமைச்சர் மெலனி ஜோலி (Mélanie Joly) இந்த விடயம் குறித்து பேசுகையில், F-35 விமானக் கொள்முதல் ஒப்பந்தம் கனடாவுக்குப் போதுமான தொழில்துறை நன்மைகளையும் வேலைகளையும் உருவாக்கவில்லை என்று தெரிவித்தார். F-35 விமானத் தயாரிப்பு நிறுவனமான லாக்ஹீட் மார்ட்டின் (Lockheed Martin) நிறுவனம் கனடாவுக்குப் போதுமான பொருளாதார நன்மைகளை மேம்படுத்தாவிட்டால், தமது அரசாங்கம் கிரிப்பன் விமானத்தைத் தேர்வு செய்வது குறித்து பரிசீலிக்கும் என்றும் தொழில்துறை அமைச்சர் மெலனி ஜோலி (Mélanie Joly) கூறியுள்ளார்.
