மொன்றியல் நகரின் தேர்தல் நாளான நவம்பர் மாதம் 2 ஆம் திகதி மொண்ட்ரீயல் பொதுப் போக்குவரத்துக் கழகமான எஸ்.டி.எம்-மின் (STM – Société de transport de Montréal) பராமரிப்பு ஊழியர்கள் தொழிற்சங்கம் வேலை நிறுத்தத்தில் ஈடுபடுகின்றமை உறுதியாகியுள்ளது.
ஒக்டோபர் மாதம் 31 ஆம் திகதி இரவிலிருந்து நவம்பர் மாதம் 28 ஆம் திகதி இரவு வரை, தமது உறுப்பினர்கள் வேலை நிறுத்தத்தில் ஈடுபடவுள்ளதாக, அந்த தொழிற்சங்கம் அறிவித்துள்ளது.
வேலைநிறுத்தத்தின்போது ஊழியர்கள் கூடுதல் நேரம் (Overtime) வேலை செய்ய மறுப்பார்கள் என்றும் மற்றும் Rush hours என்று சொல்லப்படும் போக்குவரத்து சேவை அதிகமாக தேவைப்படும் மணித்தியாலங்களில் மட்டுமே குறைந்தபட்ச சேவையை வழங்குவார்கள் என்றும் தெரிவிக்கப்பட்டுள்ளது.
மொன்றியல் நகரின் உள்ளாட்சித் தேர்தல் நாளான நவம்பர் 2 அன்று, வாக்காளர்கள் வாக்களிப்பதற்கு வசதியாக, அதிக நேரம் பணியாற்ற வேண்டும் என, மொண்ட்ரீயல் பொதுப் போக்குவரத்துக் கழகமான எஸ்.டி.எம், தொழிற்சங்கத்துக்கு கோரிக்கை விடுத்திருந்தது.
எனினும், அந்த கோரிக்கையை பராமரிப்பு ஊழியர்கள் தொழிற்சங்கம் ஏற்க மறுத்துள்ளமை குறிப்பிடத்தக்கது.
