சீனா மீதான கனடாவின் 100 சதவீத மின்சார வாகன (EV) வரியை நீக்க வேண்டும் என்று, மனிடோபா மாகாண முதல்வர் வாப் கினியூ (Wab Kinew) பிரதமர் மார்க் கார்னியைக் கோரியுள்ளார்.
இந்த நடவடிக்கையின் மூலம், பதிலுக்கு கனடாவின் முக்கிய விவசாயப் பொருட்களான கனோலா (Canola) மற்றும் பன்றி இறைச்சி (Pork) மீதான சீன வரியை நீக்க முடியும் என்றும், இதன் மூலம் மேற்கு கனடாவின் விவசாயப் பொருளாதாரத்தைக் காப்பாற்றலாம் என்றும் அவர் தெரிவித்துள்ளார்.
இவ்விடயம் தொடர்பில் பிரதமருக்கு, வாப் கினியூ (Wab Kinew) அனுப்பிய கடிதத்தில், கனடாவின் தற்போதைய வர்த்தகக் கொள்கை “மேற்கு கனடாவைச் சமநிலையற்ற வகையில் பாதிக்கும் இரட்டை வர்த்தகப் போரை” உருவாக்கியுள்ளது என்று குற்றம் சாட்டியுள்ளார்.
சீனாவின் மின்சார வாகனங்கள் மீதான கனடாவின் வரியை நீக்கினால், கனோலா மற்றும் பன்றி இறைச்சி மீது தமது நாடு விதிக்கும் வரியை நீக்கத் தயார் என்று, அண்மையில் சீனத் தூதர் வாங் டி (Wang Di) கூறியிருந்தார்.
இதனை தமது கடிதத்தில் சுட்டிக்காட்டிய மனிடோபா மாகாண முதல்வர் வாப் கினியூ (Wab Kinew) , இது ஒரு “முக்கியமான தருணம்” என்றும், இந்த வாய்ப்பை மத்திய அரசு பயன்படுத்த வேண்டும் என்றும் குறிப்பிட்டுள்ளார்.
