கனடாவில் உள்ள உள்நாட்டு வேலைவாய்ப்புகளையும், பொருளாதாரத்தையும் பாதுகாப்பதில் அமெரிக்காவை விட கனடா பின்தங்கி இருப்பதாக, கனடாவின் மத்திய வீட்டுவசதி மற்றும் உள்கட்டமைப்பு அமைச்சர் கிரிகோர் ராபர்ட்சன் தெரிவித்துள்ளார்.
இந்த கருத்து, B.C. Ferries நிறுவனம், சீன நிறுவனத்திடம் இருந்து கப்பல்கள் வாங்க ஒப்பந்தம் செய்துள்ள விவகாரம் தொடர்பாக எழுந்த விமர்சனங்களுக்குப் பதிலளிக்கும் விதமாக அமைந்துள்ளது.
B.C. Ferries நிறுவனம், சீன அரசாங்கத்திற்குச் சொந்தமான China Merchants Industry Weihai Shipyards என்ற நிறுவனத்திடமிருந்து நான்கு புதிய மின்சார-டீசல் கப்பல்களை வாங்குகிறது.
இதற்காக கனடாவின் உள்கட்டமைப்பு வங்கி 1 பில்லியன் டொலர் கடன் உதவியை வழங்குகிறது.
கப்பல்களை சீன நிறுவனத்திடம் இருந்து வாங்கும் முடிவானது, B.C. Ferries நிறுவனத்தினால் மேற்கொள்ளப்பட்டது என்றும், இதற்கு மத்திய அரசு நேரடியாக பொறுப்பல்ல என்றும் அமைச்சர் ராபர்ட்சன் தெரிவித்துள்ளார்.
உள்நாட்டு உற்பத்தியை ஊக்குவிக்கும் வகையில் “buy Canada” கொள்கையை, மத்திய அரசு அமல்படுத்தி வருவதாகவும் அவர் தெரிவித்துள்ளார்.
