கனடாவின் முன்னணி எண்ணெய் மற்றும் எரிவாயு துறை நிறுவனங்களின் கூட்டமைப்பு ஒன்று, அல்பேர்ட்டா மாகாணத்தின் இரண்டு பெரிய ஆற்றுப் படுகைகளை ஒன்றிணைக்கும் யோசனைக்கு ஆதரவு தெரிவித்துள்ளது.
இந்த நடவடிக்கை, கைத்தொழில் தேவைகளுக்காக நீர் மாற்றுவதற்கான நடைமுறைகளை எளிதாக்கும் என எதிர்பார்க்கப்படுகிறது.
எனினும், இந்தத் திட்டத்தை சுற்றாடல் பாதுகாப்பு அமைப்புகள் கடுமையாக எதிர்க்கின்றன.
இத்திட்டம் நடைமுறைப்படுத்தப்பட்டால், பாரிய சுற்றுச்சூழல் அபாயங்கள் ஏற்படும் என அவை எச்சரிக்கின்றன.
கனடாவின் எண்ணெய் மற்றும் எரிவாயு நிறுவனங்களைப் பிரதிநிதித்துவப்படுத்தும் கனடியன் அசோசியேஷன் ஒப் பெட்ரோலியம் புரொடியூசர்ஸ் (CAPP) எனப்படும் அமைப்பு, பீஸ்/ஸ்லேவ் (Peace/Slave) மற்றும் அதாபாஸ்கா (Athabasca) ஆகிய இரண்டு ஆற்றுப் படுகைகளையும் இணைப்பதன் மூலம் தேவையற்ற நீர் உட்கட்டமைப்புகளைத் தவிர்க்கலாம் என்றும், சுற்றுச்சூழல் பாதிப்பைக் குறைக்கலாம் என்றும் வாதிடுகிறது.
எவ்வாறாயினும், சுற்றாடல் பாதுகாப்பு அமைப்புகள் இந்த முன்மொழிவு குறித்து கடுமையான சந்தேகங்களை எழுப்பியுள்ளமை குறிப்பிடத் தக்கது.
