அமெரிக்கா ஈரானின் கெஷ்ம் (Qeshm) தீவில் தாக்குதல் நடத்தியதைத் தொடர்ந்து, ஈரான் வளைகுடா நாடுகள் மீது புதிய தாக்குதல்களை முன்னெடுத்துள்ளதாகத் தகவல்கள் வெளியாகியுள்ளன.
குவைத்தில் அமெரிக்க இராணுவம் பயன்படுத்தும் விமானப்படைத் தளத்தை இலக்காகக் கொண்டு ஈரான் தாக்குதல் நடத்தியுள்ளதாகத் தெரிவிக்கப்பட்டுள்ளது.
மேலும், பஹ்ரைன் நாட்டின் மீதும் பல்வேறு தாக்குதல்களை ஈரான் மேற்கொண்டுள்ளதாகக் கூறப்படுகிறது.
இதற்குப் பதிலடியாக, ஆளில்லா விமானங்கள் மூலம் நடத்தப்பட்ட தாக்குதல்களை முறியடிப்பதற்காகத் தமது வான் பாதுகாப்பு அமைப்புகளைச் செயல்படுத்தியதாக குவைத் அறிவித்துள்ளது.
கடந்த செப்டம்பர் மாதத்திற்குப் பின்னர், இவ்வாறான ஆளில்லா விமானத் தாக்குதல்களை எதிர்கொள்ளும் வகையில் குவைத் தனது வான் பாதுகாப்பு அமைப்புகளைச் செயல்படுத்தியிருப்பது இதுவே முதல் முறையாகும்.
இதேவேளை, இன்று புதன்கிழமை அதிகாலை தமது நாட்டை இலக்காகக் கொண்டு நடத்தப்பட்ட ஈரானின் தாக்குதலை முறியடித்துள்ளதாக பஹ்ரைன் தெரிவித்துள்ளது. இதற்கு முன்னதாக, ஹோர்முஸ் நீரிணைப் பகுதியில் அமைந்துள்ள ஈரானின் கெஷ்ம் தீவில், ஏவுகணை ஏவுதளத்தைக் குறிவைத்து அமெரிக்கா தாக்குதல் நடத்தியிருந்தது.
இந்தத் தாக்குதல்களைத் தொடர்ந்து ஈரானுக்கும் அமெரிக்காவுக்கும் இடையிலான மோதல் வளைகுடா பிராந்தியத்திற்கும் விரிவடையும் அபாயம் ஏற்பட்டுள்ளதாகக் கவலை வெளியிடப்பட்டுள்ளது.
