பிரதமர் மார்க் கார்னி (Mark Carney) மற்றும் கியூபெக் மாகாண முதலமைச்சர் போல் செயிண்ட்-பியர் பிளாமண்டன் (Paul St-Pierre Plamondon) ஆகியோருக்கு இடையிலான அரசியல் ரீதியிலான முரண்பாடுகள், மேலும் தீவிரமடைந்துள்ளன.
அமெரிக்க மாநிலங்களுடன் நேரடியாகப் பேச்சுவார்த்தை நடத்தும் கியூபெக்கின் முயற்சி குறித்தே, இந்த முரண்பாடு தீவிரமடைந்துள்ளது.
மொன்றியலில் நடைபெற்ற செய்தியாளர் சந்திப்பொன்றில் உரையாற்றிய பிரதமர் மார்க் கார்னி, அமெரிக்க மாநிலங்களுடன் நேரடியாக இருதரப்பு ஒப்பந்தங்கள் குறித்துப் பேசுவதற்கான கியூபெக் அரசின் திட்டத்திற்கு, தனது எதிர்ப்பை வெளிப்படையாகப் பதிவுசெய்தார்.
அண்மையில் நடைபெற்ற அமெரிக்கத் தேர்தலைத் தொடர்ந்து, புதிதாகத் தேர்ந்தெடுக்கப்பட்ட அமெரிக்க மாநில ஆளுநர்கள் மற்றும் செனட்டர்கள் உட்பட 59 பிரதிநிதிகளுக்குக் கியூபெக் முதலமைச்சர் செயிண்ட்-பியர் பிளாமண்டன் கடிதங்களை அனுப்பியிருந்தார்.
அக்கடிதங்களில், கியூபெக் மற்றும் அந்தந்த அமெரிக்க மாநிலங்களுக்கு இடையிலான வர்த்தக உறவுகளைச் சுட்டிக்காட்டியதுடன், “இருதரப்பு மக்களின் நலனுக்காக புதிய திட்டங்கள் மற்றும் முயற்சிகளில் நேரடியாக இணைந்து பணியாற்ற” வருமாறு, கியூபெக் முதலமைச்சர் அழைப்பு விடுத்திருந்தார்.
இந்த நடவடிக்கை தொடர்பில் கேள்வி எழுப்பப்பட்டபோதே பிரதமர் மார்க் கார்னி தனது கண்டனத்தைத் தெரிவித்துள்ளார்.
பிரதமரின் இந்தக் கருத்துகளுக்கு உடனடியாகப் பதிலளித்த கியூபெக் முதலமைச்சர் செயிண்ட்-பியர் பிளாமண்டன், ”சர்வதேச அளவில் கியூபெக் தனது சொந்த நலன்களைப் பிரதிநிதித்துவப்படுத்துவதையும், வழக்கமாகச் செய்துவரும் சர்வதேசத் தொடர்புகளையும் தடுக்கும் அதிகாரம் அவருக்கு இல்லை” என்று குறிப்பிட்டுள்ளார்.
