கியூபெக் மாகாணத் தேர்தலில் வெற்றி பெற்று ஆட்சியைப் பிடித்துள்ள பார்ட்டி கியூபெக்வா (Parti Québécois – PQ) கட்சியின் தலைவர் போல் செயிண்ட்-பியர் பிளமண்டன், தாம் ஆட்சிப் பொறுப்பேற்றவுடன் உடனடி அதிரடி நடவடிக்கைகளை மேற்கொள்ளவுள்ளதாக அறிவித்துள்ளார்.
தேர்தல் முடிவுகள் வெளியாகி சிறுபான்மை அரசாங்கத்தை அமைப்பது உறுதியான நிலையில், நடைபெற்ற ஊடகவியலாளர் சந்திப்பில் கருத்து வெளியிட்ட அவர், தாம் அனைத்து கியூபெக் மக்களுக்குமான அரசாங்கத்தை நடத்தவுள்ளதாகத் தெரிவித்துள்ளார்.
தமது புதிய அரசாங்கம் மேற்கொள்ளவுள்ள முக்கிய நடவடிக்கைகள் குறித்துப் பேசிய அவர், மாகாணத்தில் வீடற்றோர் எண்ணிக்கையை பாதியாகக் குறைப்பதே புதிய அரசின் முதன்மை இலக்கு என்றும், இதற்காக விசேட உச்சி மாநாடு ஒன்று நடத்தப்படவுள்ளது என்றும் குறிப்பிட்டுள்ளார்.
அத்துடன், கியூபெக் மாகாணத்தில் உணவுப் பஞ்சத்தைப் போக்கும் உணவு வங்கிகளுக்கான (Food Banks) நிதியுதவி ஆண்டிற்கு 5 மில்லியன் டொலர்களால் அதிகரிக்கப்படும் என்றும் அவர் தெரிவித்துள்ளார்.
மேலும், அமைச்சரவையின் அளவைக் குறைப்பதுடன், மக்கள் பிரதிநிதிகள் மற்றும் அரச நிறுவன உயர் அதிகாரிகளின் சம்பளத்தைக் கட்டுப்படுத்தும் சட்டமூலம் கொண்டுவரப்படும் என்றும் கூறினார்.
கியூபெக் மாகாணத்தின் வரி முறைகளில் மாற்றங்கள் கொண்டுவரப்படும் எனத் தெரிவித்த அவர், எரிபொருள் மீதான வரி குறைக்கப்படுவதுடன், பயன்படுத்தப்பட்ட பொருட்கள் (Used goods) மீதான வரி முழுமையாக நீக்கப்படும் எனவும் கூறினார்.
மேலும், அமெரிக்காவுடனான வர்த்தகப் பேச்சுவார்த்தைகளைக் கையாளத் தனியாக ஒரு குழு அமைக்கப்படும் எனவும் தெரிவித்துள்ளார்.
கியூபெக் மாகாண சட்டமன்றத்தில் பார்ட்டி கியூபெக்வா கட்சி 59 ஆசனங்களைக் கைப்பற்றியுள்ளது.
பெரும்பான்மை ஆட்சிக்கு 64 ஆசனங்கள் தேவை என்ற நிலையில், அக்கட்சி சிறுபான்மை அரசாங்கத்தையே அமைக்கவுள்ளது.
சார்ள்ஸ் மிலியார்ட் தலைமையிலான கியூபெக் லிபரல் கட்சி 40 ஆசனங்களைப் பெற்று முதன்மை எதிர்க்கட்சியாகச் செயல்படவுள்ளது. லிபரல் மற்றும் கன்சர்வேடிவ் கட்சிகளிடமிருந்து எதிர்ப்புகள் எதிர்பார்க்கப்பட்டாலும், கியூபெக் சோலிடேர் (QS) கட்சியுடன் இணைந்து செயல்பட முடியும் என நம்புவதாக பிளமண்டன் தெரிவித்தார்.
எனினும், தங்களது ஆதரவு நிபந்தனையற்றது அல்ல என்று கியூபெக் சோலிடேர் கட்சியின் இணைப் பேச்சாளர் ரூபா கசால் தெளிவுபடுத்தியுள்ளார்.
