ருவாண்டா அரசாங்கத்திற்கு உதவி செய்யும் நோக்கில், பொலிஸ் தரவுத்தளத்தை (database) சட்டவிரோதமாகப் பயன்படுத்தித் தகவல்களைப் பெற்றதாகக் குற்றம் சாட்டப்பட்ட ‘றோயல் கனடியன் மவுண்டட் பொலிஸ்’ (RCMP) அதிகாரி அனைத்துக் குற்றச்சாட்டுகளிலிருந்தும் விடுவிக்கப்பட்டுள்ளார்.
39 வயதான எலி நடாடுஜே (Eli Ndatuje) என்ற அதிகாரியே இவ்வாறு விடுதலை செய்யப்பட்டுள்ளார். இவர் மீது குற்றவியல் சட்டம் மற்றும் தகவல் பாதுகாப்புச் சட்டத்தின் கீழ் மூன்று குற்றச்சாட்டுகள் சுமத்தப்பட்டிருந்தன.
இது தொடர்பான விசாரணை ரெட் டீரின் கிங்ஸ் பெஞ்ச் நீதிமன்றத்தில் (Red Deer Court of King’s Bench) நடைபெற்றது.
கடந்த 2022ஆம் ஆண்டு ஏப்ரல் மாதம் பொலிஸ் தரவுத்தளத்தைச் சட்டவிரோதமாக அணுகி, தகவல்களை ஒட்டாவாவிலுள்ள ருவாண்டா உயர்ஸ்தானிகராலயத்திற்கு வழங்கியதாக நடாடுஜே மீது குற்றம் சாட்டப்பட்டிருந்தது.
தாம் தரவுத்தளத்தில் தேடலை மேற்கொண்டதை ஒப்புக்கொண்ட நடாடுஜே, அத்தகவல்களை யாருடனும் பகிரவில்லை எனத் தெரிவித்திருந்தார்.
இவ்வழக்கில் தீர்ப்பளித்த நீதிபதி ஜேசன் வில்கின்ஸ் (Jason Wilkins), முன்வைக்கப்பட்ட ஆதாரங்கள் நியாயமான சந்தேகத்திற்கு அப்பாற்பட்டு குற்றத்தை நிரூபிக்க போதுமானதாக இல்லை என்று குறிப்பிட்டார்.
நடாடுஜே தவறான நோக்கத்துடனோ அல்லது ஊழல் எண்ணத்துடனோ செயல்படவில்லை என்றும், பொது நலன் கருதியே செயல்பட்டுள்ளார் என்றும் நீதிபதி தெரிவித்தார்.
ஒட்டாவாவிலுள்ள ருவாண்டா தூதரின் வீட்டில் பணிபுரிந்த பெண் காணாமல் போனமை தொடர்பாக, ருவாண்டா உயர்ஸ்தானிகராலய நண்பர் ஒருவர் கவலை தெரிவித்ததால், அப்பெண் குறித்து ஒரு தேடலை மேற்கொண்டதாக நடாடுஜே நீதிமன்றத்தில் தெரிவித்தார்.
தேடலில் தகவல்கள் எதுவும் கிடைக்காததால், ஒட்டாவா பொலிஸ் பிரிவைத் தொடர்பு கொள்ளுமாறு அவர் யோசனை கூறியிருந்தார்.
கனடாவின் ஒருங்கிணைந்த தேசிய பாதுகாப்பு அமலாக்கக் குழுவினால் (INSET) மேற்கொள்ளப்பட்ட தீவிர கண்காணிப்புகள் மற்றும் தொலைபேசி உரையாடல் பதிவுகளில் (wiretaps) நடாடுஜே தவறு செய்ததற்கான எவ்வித ஆதாரங்களும் கண்டறியப்படவில்லை என்றும் நீதிபதி சுட்டிக்காட்டினார். போதிய ஆதார வலுவின்மை காரணமாகவே நடாடுஜே விடுவிக்கப்படுவதாக நீதிபதி தீர்ப்பளித்தார்.
