கனடாவின் மொண்ட்ரியல் நகரிலுள்ள பார்க் எக்ஸ்டென்ஷன் (Parc-Extension) பகுதியில் உள்ள இருமாடிக் கட்டடமொன்றில் இன்று அதிகாலை ஏற்பட்ட திடீர் தீ விபத்தில் மூவர் காயமடைந்துள்ளனர்.
அத்துடன், 30 பேர் தங்களது இருப்பிடங்களை இழந்து இடம்பெயர்ந்துள்ளனர்.
இன்று அதிகாலை 2.00 மணியளவில், டி லெப்பே வீதிக்கு (De l’Épée Avenue) அருகில் அமைந்துள்ள சென்-ரோக் வீதியிலுள்ள (St-Roch Street) இருமாடிக் கட்டடத்திலேயே இந்தத் தீ விபத்து சம்பவித்துள்ளது.
குறித்த கட்டடத்தின் தரைத்தளம் வணிக பயன்பாட்டிற்காகப் பயன்படுத்தப்பட்டு வந்த நிலையில், மேல் தளத்தில் சுமார் 10 குடியிருப்புகள் அமைந்திருந்ததாகத் தெரிவிக்கப்படுகிறது.
தீ விபத்து ஏற்படுவதற்கு முன்னர் உரத்த வெடிச்சத்தம் கேட்டதாக அப்பகுதி மக்கள் தெரிவித்துள்ளனர்.
சம்பவம் தொடர்பில் தகவலறிந்ததும் 100க்கும் மேற்பட்ட தீயணைப்பு வீரர்கள் உடனடியாக சம்பவ இடத்திற்கு விரைந்து சென்று தீயைக் கட்டுப்படுத்தும் பணியில் ஈடுபட்டனர்.
தீயணைப்புப் படையினர் சம்பவ இடத்திற்குச் சென்றடைவதற்கு முன்னரே கட்டடம் முழுவதும் தீ பரவி எரிந்துகொண்டிருந்ததாகவும், அதன் ஒரு பகுதி இடிந்து விழுந்ததாகவும் மொண்ட்ரியல் தீயணைப்புத் திணைக்களத்தின் பிரிவு அதிகாரி வில்லியம் முர்ரே (William Murray) தெரிவித்தார்.
இவ்விபத்தில் லேசான காயங்களுக்குள்ளான மூவர் அவசர மருத்துவச் சேவைப் பிரிவினரால் (Urgences-santé) மீட்கப்பட்டு மருத்துவமனையில் அனுமதிக்கப்பட்டுள்ளனர்.
அதேவேளை, தங்களது வீடுகளை இழந்து நிர்க்கதிக்குள்ளான 30 பேருக்குக் கனடிய செஞ்சிலுவைச் சங்கம் (Red Cross) தற்காலிக இருப்பிடம் மற்றும் அவசிய உதவிகளை வழங்கி வருகிறது.
காலை 7.00 மணியளவில் தீ பரவுவது முழுமையாகக் கட்டுப்படுத்தப்பட்ட போதிலும், தீ மீண்டும் பரவாமல் இருப்பதை உறுதிசெய்வதற்காகத் தீயணைப்பு வீரர்கள் தொடர்ந்து கண்காணிப்புப் பணிகளில் ஈடுபட்டிருந்தனர்.
இத் தீ விபத்திற்கான காரணம் குறித்துத் தீயணைப்புத் திணைக்கள அதிகாரிகள் தீவிர விசாரணைகளை முன்னெடுத்து வருகின்றமை குறிப்பிடத்தக்கது.
