ஜெர்மனியின் முன்னாள் உளவுத்துறைத் தலைவரும், உள்நாட்டலுவல்கள் அமைச்சகத்தின் முன்னாள் மாநிலச் செயலாளருமான 80 வயதான ஆகஸ்ட் ஹானிங் (August Hanning), தேசத்துரோகம் மற்றும் ஒற்றாடல் குற்றச்சாட்டுகளின் கீழ் கைது செய்யப்பட்டுள்ளார்.
ஜெர்மனியின் நவீன வரலாற்றில் இடம்பெற்ற மிகப்பாரிய ஒற்றாடல் சர்ச்சையாக இது பார்க்கப்படுகிறது.
வெளிநாட்டு உளவு அமைப்புகளுடன் தொடர்புகளைப் பேணி, அரசு ரகசியங்களைப் பெற்றுக் கொடுத்து தேசத்துரோகத்தில் ஈடுபட முயன்றதாக ஜெர்மன் கூட்டாட்சி அரசுத் வழக்கறிஞர் அலுவலகம் உறுதிப்படுத்தியுள்ளது.
மூன்ஸ்டர் நகருக்கு அருகில் உள்ள நோர்ட்வால்டே பகுதியில் அமைந்திருந்த அவரது வீட்டில் வைத்து, முகமூடி அணிந்த பொலிஸாரால் அவர் கைது செய்யப்பட்டார்.
1998 ஆம் ஆண்டு முதல் 2005 ஆம் ஆண்டு வரை ஜெர்மனியின் கூட்டாட்சி உளவு அமைப்பின் (BND) தலைவராகப் பணியாற்றிய ஹானிங், பின்னர் 2009 ஆம் ஆண்டு வரை உள்நாட்டலுவல்கள் அமைச்சகத்தில் மூத்த அதிகாரியாகச் செயலாற்றினார்.
ஓய்வுக்குப் பிறகு தனியார் ஆலோசனைக் சேவைகளை வழங்கி வந்த இவர், உளவுத்துறை தரவுகளைப் பயன்படுத்தி வெளிநாட்டு உளவு அமைப்புகளுக்கு பகுப்பாய்வு அறிக்கைகளைத் தயாரிக்க முயன்றதாகக் குற்றம்சாட்டப்பட்டுள்ளது.
இச்சம்பவத்தில் கூட்டாட்சி உளவு அமைப்பின் முன்னாள் பணியகத் தலைவரான “மேன்ஃப்ரெட் டி” (Manfred D) என்பவரும் கைது செய்யப்பட்டுள்ளார்.
2010ஆம் ஆண்டிலிருந்து, பணப் பிரதிபலனுக்காக சுமார் 2,000 ரகசிய ஆவணங்களை ஹானிங்கிற்கு “மேன்ஃப்ரெட் டி” தொடர்ச்சியாக வழங்கி வந்துள்ளதாக தெரிவிக்கப்படுகிறது.
கசிந்த ஆவணங்களில் ஈரானின் அணுசக்தித் திட்டம், ரஷ்ய இராணுவ நடவடிக்கைகள் மற்றும் நட்பு நாடுகளின் ரகசியத் தகவல்கள் அடங்கியுள்ளதாக ஊடகங்கள் செய்தி வெளியிட்டுள்ளன.
மேலும், அஜர்பைஜான் மற்றும் இஸ்ரேலிய உளவு அமைப்புகளுடனும் ஹானிங்கிற்கு தொடர்புகள் இருந்ததாகச் சந்தேகிக்கப்படுகிறது.
தொழிலதிபர் கிறிஸ்டினா பிளாக் என்பவரின் “குழந்தைகள் கடத்தல் வழக்கை” விசாரித்தபோதே, ஹானிங்கின் இந்த ஒற்றாடல் பின்னணி வெளிச்சத்திற்கு வந்தது.
விவாகரத்து பெற்ற கணவரிடமிருந்த குழந்தைகளைக் கடத்துவதற்காக, இஸ்ரேலின் தனியார் உளவு நிறுவனத்துடன் கிறிஸ்டினாவை ஹானிங் இணைத்து வைத்ததாகவும் குற்றச்சாட்டுகள் நிலுவையில் உள்ளன.
இவ்விவகாரத்தில் உளவுத்துறைக்குள்ளேயே தீவிர விசாரணை நடத்தப்பட்ட பின்னரே வழக்கு தொடரப்பட்டதாகவும், உள்நாட்டுப் பாதுகாப்பில் எந்தவொரு விட்டுக் கொடுப்பிற்கும் இடமில்லை என்றும் கூட்டாட்சி உளவு அமைப்பின் தற்போதைய தலைவர் மார்ட்டின் ஜெய்கர் வலியுறுத்தியுள்ளார்.
